Shillong, Nailar 30
U State President ka Bharatiya Janata Party (BJP), Bah Ernest Mawrie ha ka Sngi Balang u la ong ba kam don kano-kano ka jingteh kyndon ïa uno-uno u briew uba kwah ban neh ne mih noh na ka seng.
Halor ka jingkwah leit pynïasoh NPP jong u Bah H.M. Shangpliang uba long ruh u nongaiktien ka BJP, u Bah Mawrie u la ong ba um don jingtip eiei halor katei ka bynta namar kam shym la don kano-kano ka jingïakren bad u la shu ïohi ïa katei lyngba ki lad pathai khubor.
“Ka shong ha u briew shimet, ym don kano-kano ka jingteh kyndon la u kwah ban neh ne mih noh na ka seng,” ong u Bah Mawrie.
Haba kdew ba katei baroh ka shong ha ka jingsngew jong u Bah Shangpliang, u President u la ong ba ka seng ka la leh bha bad ai tiket ruh ïa u ban ïakhun na ka seng ha kane ka ilekshon ba dang shu dep sha ka Ïingdorbar thawaiñ ka Jylla nalor kiwei-kiwei ki lad jingïarap.
“Ka shong ha u haduh katno u sngewnguh ïa ka seng,” u la ong.
Ha kawei ka liang, u la ong ba haduh mynta, um pat ïohsngew eiei na u Bah Shangpliang halor katei ka bynta, hynrei u la shu ïohsngew na ki briew jong u na Mawsynram bad ha ka Sngi Ba-ar na u Symbud Myntri Rangbah ka Jylla, Bah Sniawbhalang Dhar ha ki lad pathai khubor.
“Ngi sngewlyngngoh ba ym don kano-kano ka daw ne jingpynshai na u (Bah Shangpliang) ban mih noh namar kam shym la don ka jingïakren,” u la ong.
Haba kylli, u la ong, “Ka por kan sa poi kaei ban leh na ka liang ka seng. Ka seng ka la ïarap shi kat dei ïa u ha kane ka ilekshon ba la dep nalor kiwei-kiwei ki lad jingïarap.”
U la ban biang ba wat la ka seng ka la leh bha katba lah ïa u Bah Shangpliang, hynrei ha kaba kut ka shong ha ka rai shimet jong u.
U Symbud Myntri Rangbah ka Jylla bad nongïalam ka NPP, Bah Sniawbhalang Dhar ha ka Sngi Ba-ar u la pyntikna ba u nongaiktien ka BJP, Bah H.M. Shangpliang u la pynpaw ïa ka jingkwah jong u ban pynïasoh noh sha ka seng (NPP).
U Bah Dhar ha kawei ka liang u la pynshai ba ka seng kam pat ai kano-kano ka jingkular ïa u Bah Shangpliang ban ai tiket ïa u na bynta ban ïakhun ha kane ka ilekshon ban wan sha ka Lok Sabha na Shillong Parliamentary konstitwensi naba ki don bun ngut kiba kwah ïa ka tiket.
Na ka liang u Symbud Myntri Rangbah u la ong ba ki nongïalam ka seng kin sa shong ban ïakren haba ïadei bad ka jingwan pynïasoh jong u Bah Shangpliang sha ka NPP.
