Shillong, Nailar 30
U State President ka TMC, Bah Charles Pyngrope u la pynsngew ba u Vice-President ka seng, Bah George B. Lyngdoh un long u kyrtong uba biang eh ban ïakhun ïa ka ilekshon ban wan sha ka Lok Sabha na Shillong Parliamentary konstitwensi.
Haba kren sha ki lad pathai khubor ha ka Sngi Balang, u Bah Pyngrope u la ong ba haba phai sha ka TMC, um pat ïoh ban ïakren bad ki bor ba halor jong ka seng – u General Secretary ‘in-charge’, Dr. Manas Bhunia haba ïadei bad ka ilekshon ban wan.
“Nga la ïakren bad u hynne ka step ban ïakynduh bad u. Lehse un wan ma u shane ne ngan leit ma nga sha Kolkata ban pynbeit kumno ngin ïaid shakhmat bad kane ka kam,” u la ong.
Haba kylli, u la pyntikna ba ka TMC kan ïakhun ïa kane ka ilekshon ban wan sha ka Lok Sabha ha baroh 2 tylli ki konstitwensi (Shillong bad Tura).
Halor ki kyrtong, u President u la kyrngah bad ong ba ïa kane yn sa lah ban batai shai tang hadien ba la ïoh jingmynjur na ka seng namar yn hap ban mynjur shuwa halor katto-katne ki mat hashuwa ban ïaid shakhmat bad katei ka bynta.
Haba jubab, u Bah Pyngrope u la ong, “Haba phai sha Shillong, ha nga shimet (hynrei ka shong ha ka seng baroh kawei), nga sngew ba u Bah George B. Lyngdoh un long u kyrtong uba biang eh.”
Kum ban shu kdew hangne, u Bah Lyngdoh u dei u MLA barim ka Umroi konstitwensi.
Shuh shuh haba phai pat sha Ri-lum Garo, utei u nongïalam ba rangbah ka seng u la ong ba u ieh ïa kane ka kam ha ka jingstad jong u nongïalam ka Parliamentary Party ka TMC, Dr. Mukul Sangma.
Kumba ka long mynta, ki seng saiñ pyrthei kiba la pynbna ïa ki kyrtong ban ïakhun ha ka ilekshon ban wan sha ka Lok Sabha na Shillong Parliamentary konstitwensi ki kynthup ïa ka Congress – Bah Vincent H. Pala bad ka Voice of the People Party (VPP), Dr. Ricky A.J. Syngkon.
