Shillong, Nailar 30
Ka Meghalaya High Court ha ka Sngi Ba-Ar ka la bthah ïa ka sorkar Meghalaya bad Assam ba kin ïatreilang khnang ban ïaleh pyrshah ïa ki kam be-aiñ kiba ïadei bad u dewïong.
Haba shong bishar halor ki mukotduma bapher-bapher kiba ïadei bad ka jingtih bad jingkit be-aiñ ïa u dewïong, ka High Court ka la bthah ruh ba ka sorkar Assam ka dei ban peitngor ïa kito ki briew kiba ka ïingbishar ka la dep ban ai jamin lypa hynnin ka sngi khnang ba kin lait na ka jingshah kem. Kine ki briew ki dei kiba donkti bad ka jingpynïaid ïa ki karkhana thang dewïong be-aiñ bad na ka daw ba ki sheptieng ïoh ki shah kem, ki la leit pan jamin lypa (Anticipatory Bail) na ka High Court.
Na ka liang ka High Court ka la ai ïa kata ka jamin ryngkat bad ka jingteh kyndon ïa ki. Ka High Court ka la ong ruh ba ka sorkar Assam ka dei ban ïarap ïa ka sorkar Meghalaya bad ïa ka kynhun tohkit na Meghalaya ban peitngor ïa kitei ki briew ba la ïoh jamin.
Ha kawei pat ka liang, u Justice BP Katakey, uba dei u nongbishar ba la shongthait, u la aiti ïa ka kaiphod kaba khathynriew sha ka High Court. Ka ïingbishar ka la bthah ïa ka sorkar jylla ba kan bud beit thik ïa ka por ba la ai ha kaba ïadei bad ka jingdie lilam ïa u dewïong uba la dep tih lypa.
U Justice Katakey u la ai ruh bad ki kyndon bad kiwei ki jingdonkam ha kaba ïadei bad uta u dewïong ba la dep ban tih. Ka ïingbishar ka la bthah ïa ka sorkar jylla ba kan ai ïa ka jingïatreilang kaba pura bad u Justice Katakey bad ban bud beit thik ïa ka por ba la buh khlem da don jingthut.
Nalorkata, ka ïingbishar ka la ong ba hap ban phikir bha ban pynthikna ba kito ki briew kiba la dep ban thied ïa u dewïong ba la tih mynshwa, kim dei ban ïoh lad ban pyni thok ba u dewïong ba la tih be-aiñ u dei u dewïong uba la tih kham mynshwa.
Ka jingbishar ïa kitei ki mukotduma kan long biang ha ka 26 tarik Nailur, 2023.
