New Delhi, Nailar:
Ka tnat Foreign Ministry jong ka China ha ka Sngi Ba-ar ka la pynbna ba ki bor pyniaid ka China ha kane ka por, ki la weng noh ia ka aiñ ban hap peit bniah lane ban phah leh ‘test’ Covid-19 ia ki paidbah nongleit- nongwan kiba leit poi sha China na kiwei pat ki ri. Katei ka rai jong ka China ha kane ka por ka long ban plie kylluid biang ia ki paidbah nongleit-nongwan ba kin leit rung sha China da ka mynsiem ba kylluid khlem da donkam ban iaid lyngba ia ki jingpeit bniah khamtam haba iadei bad ka jingleh ia ki ‘test’ haba iadei bad ka khlam Covid-19.
Ha kajuh ka por, katei ka tnat kam bar ri jong ka China ka la pynbna ba ki paidbah kiba wan nabar jong ka ri, kim donkam shuh ruh ban pyni ia ka syrnod Covid-19 kaba long ‘Negative’ kumba la ju leh baroh shi katta haba thmu ban rung ne mih na China.
Ha u Kyllalyngkot, ka China ka la pynkut noh ia ka jingphah shong pynkyrpang ia ki paidbah jongka kiba wan poi na shabar jong ka ri.
