Leit phet rieh u Bessent sha ktem shipai hadien ba byrngem ka Iran

Washington, Naiwieng: Katkum ki khubor, la iathuh ba u Symbud ka tnat pla tyngka jong ka US, u Scott Bessent, dang shen, u la mih noh na la ïing bad leit sha ka ktem shipai,...

Washington, Naiwieng:

Katkum ki khubor, la iathuh ba u Symbud ka tnat pla tyngka jong ka US, u Scott Bessent, dang shen, u la mih noh na la ïing bad leit sha ka ktem shipai, hadien ba ka Iran ka la byrngem pyrshah ïa ka jingim jong u, da kaba pyntikna ruh lyngba ki tyllong khubor kiba don jingtip halor katei ka kam.

Ka Iran ka la pynjur ïa ka jingpyrshang ban thombor ïa ki briew jong ka US, bad ki buit pynïap briew jong ka Tehran pyrshah ïa ki nongshong shnong jong ka America, ki la poi sha ka “kyrdan kaba shalor”, la maham uwei u heh jong ka tnat syntiat ha ka sorkar Trump, ha ka jingthoh ba la ïohi da ka Reuters ha kaba kut jong u bnai ba ladep.

Ka kot khubor ka la iathuh ba ka jingjur jong ki jingbyrngem ïa u Bessent kam shym la paw satia.

Ka Iran mynshwa ka la kyntait ba ka thmu ban thombor ïa ki heh sorkar bad ki briew ha ka khyndew jong ka US.

Ka thymmei khubor ka la iathuh ba ki heh jong ka US ki la kdew ba ka jinglah jong ka Iran ban pynlong ïa ki jinghiar thma kiba heh ha US bad kiwei kiwei ki jaka shabar ri ka long kaba duna.

Ka tnat pla tyngka jong ka US kam shym la jubab mardor halor ka jingkyrpad ban ai jingmut.

U Bessent u la long ka khmat jong ka jingïakhih jong ka Washington ha ka liang ka ioh ka kot pyrshah ïa ka Tehran ha ka jingïaid jong ka thma hapdeng ka US bad ka Israel pyrshah ïa ka Iran kaba la sdang naduh ka 28 tarik u Rymphang.

Ka jinghiar thma ka US-Israel ïa ka Iran bad ka jinghiar thma ka Israel ïa ka Lebanon ha ka por jong ka thma, ka la pyniap ïa ki hajar ngut bad ki la phetwir da ki lak ngut ki briew.

Ki jinghiar thma jong ka America bad ka Israel, ki la pyniap ruh ïa ki heh ophisar jong ka Iran, kynthup ïa u nongïalam ba ha khlieh duh jong ka Ri, u Ayatollah Ali Khamenei, uba la khlad noh.