Washington, Naiwieng:
U Scott Kirby, CEO jong ka United Airlines, u la khot ïa ka khajna kaba kham heh ïa ki briew kiba riewspah tam jong ka America, kynthup ïa ka khajna spah jong ka ri bad ka khajna pateng kaba lah ban poi sha ka 100% ha ki kyrdan ba ha khlieh duh.
Ha ka jingialang bad ki nongthoh khubor, u Kirby u la kynthoh ba ka jingbym iaryngkat ha ka spah kaba nangroi ka buh jingma kaba khraw ïa ka imlang sahlang bad ka donkam ïa ka jingshimkhia jong ka polisi.
“Ngi dei ban don ïa ka khajna spah jong ka ri. Kan ym treikam katkum ka jylla namar ki briew kin shu iaid beit,” la ong u Kirby. “Bad nga pyrkhat ba ngi dei ban don ki khajna pateng kiba poi hajan 100% ha kano- kano ka kyrdan. Ngan siew ïa ki.”
Kane ka jingkren jong u ka long ruh ha ka por jong ka jingïakren ba thymmai ha America halor kumno ban weng ïa ka jingbym ïahap ha ka spah kaba nang kiew bad hato ki longïing kiba riewspah tam ki dei ban noh synñiang ïa ka bhah kaba kham heh ha ka khajna.
U Kirby u la ong ba ka rukom treikam jong kawei pa kawei ka jylla ban siew khajna ïa ka spah kan ym long kaba myntoi, namar ki briew kiba riewspah ki lah ban leit sah sha ki jaka ba kham duna ka jingkit khajna. Hadien u la pynpaw biang ïa ki jingmut jong u ha ka jingïakren bad ka Bloomberg Television, ha kaba u la ban jur ba um shym la pyrshang ban pynkhih ïa ka polisi paidbah lane ban sdang ïa ka kam saiñ hima sima.
Katkum ka jingong jong u Kirby, ka rukom treikam kaba mynta ka pynmih ïa ka jingbym iahap hapdeng kito kiba ioh ïa ka kamai jong ki nyngkong eh na ka jingsiew bad kito kiba ka spah jong ki ka iadei bad ki jingbei tyngka bad ka jingkiew dor jong ki mar ki mata. U la kynthoh ba ki nongthaw polisi ki dei ban wad ki lad ki lynti ban pynkiew khajna ïa ka spah katba lah ban pynduna ïa ka khajna na ka jingmih ba la kamai.
U Kirby u la kynthoh ruh ïa ka jingpynbeit ïa ka “nongrim ba la pynkiew” jong ka aiñ khajna jong ka US. Hapoh ka kyndon, ïa ki mar ki mata ba la hiar pateng la ju khein dor ha ka dor iew jong ki ha ka por ba u trai u iap, kaba ailad ïa ki nongioh pateng ban kiar na ka khajna jingmih na ka jingkiew dor kaba la jia ha ka por ba u trai tynrai u dang im.

