Tehran, Naiwieng:
Ka Iran ha kane ka kynti, ka la pynpaw ïa ka jaka shna missile kaba thymmai shapoh ka khyndew jongka, kaba la pyni ïa ki heh shipai kiba leit jngoh ïa katei ka jaka katba ka jingiakynad bad ka America ka dang iai bteng.
Katkum ki dur ba la pyllait paidbah da ki lad pathai khubor jong ka Iran ha ka Sngi Balang, la iohi ïa u Ali Abdollahi, uba long u heh shipai jong ka Iran bad u Majid Mousavi, uba dei u nongialam jong ka tnat shipai Revolutionary Guards Aerospace Force, katba ki dang leit ban jurip ïa ki bynta bapher jong katei ka jaka.
Hynrei la ong ba ki lad pathai khubor ruh kim shym la pynpaw paidbah hangno katei ka jaka ka don ne mynno la ring dur ïa katei ka jingleit jngoh jong kitei ki heh ka Iran.
Ka video ka pyni ïa ka lynti krem ba napoh khyndew kaba heh bha kaba la pynieng laiñ ïa ki namding kiba heh ha ki jaka buh bad jaka pyn-ïeng, ki trok shipai bad ki kali kit mar, ki lama jong ka Iran bad ki lama jong ka IRGC.
Hynrei kane ka jingleit ka wan ryngkat ruh ha kajuh ka por bad ka jingmaham ïa ka ri America, ha kaba, u Abdollahi u la ong ba ka Iran ka lah ban pyni da ka bor ba shisha jongka shabar jong ka Middle East lada ka dang iohi bad mad biang ïa ka jingshah thombor na ki bor ba nabar.
La ong ba ki heh ka Revolutionary Guards ki la pynbna ïa ka jingthmu ban plie paidbah ïa ka jaka shna ‘namding ba thymmai hapoh khyndew ha ka Sngi Saitjaiñ jong ka taïew ba la dep.
U nongaiktien jong ka IRGC, u Hossein Mohebbi, u la ong ba katto katne ka jingpynmih missile la pynkynriah shapoh khyndew ban iada ïa ka na ki jingshah thombor ha ki liengsuin bad ban pynthikna ba ka jingshna kan lah ban bteng ha ka por ba don ka thma.
U la maham ruh ba ka Iran ka lah ban wanrah ïa ki tiar ïaleh kiba kam pat pynpaw haduh mynta lada ka jingïakynad bad ka America bad ka Israel ka nang jur.
Kane ka jingpynbna ka wan ha ka por ba ka US ka dang pyrkhat ban leh shuh shuh ïa ki kam shipai pyrshah ïa ka Tehran. Ka US ka la pynlong ïa ki jinghiar thma ha Qeshm Island ha kaba sdang jong une u bnai.


