Haduh 60 tylli ki ut, yn ot u nongleh byrtong ban ïarap ïa u Putin ha ka thma Ukraine

Washington, Naiwieng: Palat saw snem ba la ïaid ka thma Russia bad Ukraine, ka jingpynbeit ïa kane ka jingïakynad ka dang long kaba eh ban ïoh. Hapdeng ka jingsahteng jong ki jingiapynbeit, uwei u u...

Washington, Naiwieng:

Palat saw snem ba la ïaid ka thma Russia bad Ukraine, ka jingpynbeit ïa kane ka jingïakynad ka dang long kaba eh ban ïoh. Hapdeng ka jingsahteng jong ki jingiapynbeit, uwei u u nongleh byrtong ba paw nam jong ka Russia, mynta u la thmu ban pyniap ïa ki 60 tylli ki ut da ka jingthmu ban ïarap ïa u President Vladimir Putin ba un ioh ïa ka jingjop hapdeng ka jingiakhun jong ka Russia pyrshah ïa ka Ukraine. Kum shi bynta jong ka jingkñia, u Artur Tsybikov, 53 snem ka rta, u kwah ban kñia 5 tylli ki mrad man la u bnai ban pan jingkyrkhu na ki blei ‘Slavic’ hyndai.

U Tsybikov u dang pynkhreh ban sdang noh ïa ka jinglehniam kñia ïa ki mrad mynta u bnai ha Angarsk, hajan Irkutsk, ka nongbah kaba jngai kumba 4,000 kilomitar (2,600 mer) na ka phang Mihngi jong ka nongbah Moscow jong ka Russia.

Utei u nongleh byrtong u la iathuh ba ïa ki mrad yn kñia na ka bynta ki paidbah ka Russia da ka jingthmu ba ka thma kan kut noh shen ha kaba ka Russia kan long ka nongjop ha kane ka thma jongka, pyrshah ïa ka Ukraine.

Kane kam dei ka sien kaba nyngkong ba u Tsybikov un pawnam haba iadei bad ki jingleh niam kñia jong u. Ha u snem 2019, u la kñia 5 tylli ki ut da ka jingthmu ban pynkhlaiñ ïa ka Russia. Ha ka

jingiakren bad ki nongthoh khubor ha katei ka por, utei u nongleh byrtong u la ong ba katei ka jingleh niam ka long ka bynta jong ka jingngeit tynrai jong kitei ki jaitbynriew jong u bad la ju pynlong ruh ïa ka, tang man la ka 300 snem.