Lamongan, Nailar:
Kawei ka skul kaba don hapoh Indonesia ka la khi lyndum ia bun ngut ki khynnah skul kynthei kiba pule ha katei ka skul tang namar ba kim shym la kup ia ka ‘Hijab’ ha ka rukom kaba dei.
Ki seng pyrshah ki la iathuh ba ki kynthei Muslim bad kumjuh ruh ki bym dei ki Muslim, ki ju shah pynbor ban kup ia ka ‘hijab’ ha ki katto katne ki bynta jong katei ka ri kaba don ia kumba 270 Million ngut ki paid nongshong shnong, ha kaba ha u snem 2021, ka la don ka jingbthah ban khang khyrdep ia kito ki skul kiba buh kyndon ia ki khynnah skul ha kum kitei ki rukom.
Ha kane ka jingjia, la ong ba ki don ki nonghikai ki bym shym la pynithuh dur ne pynpaw kyrteng na ka skul SMPN1 kaba don ha ka thaiñ East jong ka Java bad kaba don hapoh jong ka shnong Lamongan, ha kaba kitei ki nonghikai ki la khi lyndum ia 14 ngut ki khynnah skul kynthei kiba dei na ka jaitbynriew Muslim tang namar ba kim shym kup bha ia katei ka jaiñ kup ‘hijab’ haba don hapoh skul.
Ki bor pyniaid jong katei ka skul ki la pynpaw ia ka jingsngew khia halor ka jingbna khubor ia katei ka jingjia ha kane ka kynti bad ki la pan map ruh halor katei ka jingleh be-aiñ jong ki nonghikai skul bad ki bor pyniaid skul ki la iathuh ruh ba ki la dep ban pynsangeh treikam shipor ‘Suspend’ ia kitei ki nonghikai kiba don kti ha katei ka kam.
Ki bor pyniaid skul ki iathuh ba haba leit sha skul, ki ju kyntu ia ki khynnah skul ba ki dei ban da kup sa ia kawei pat ka kynja tupia napoh jong katei ka jaiñ kup ‘hijab’ khnang ba kin lah ban buhrieh lut ia baroh u shñiuh khlieh jongki khlem da pynpaw shuh ruh wat tang khyndiat hynrei ban shu iohi sa tang ia ka dur khmat jongki.
Kumta, na ka liang ki bor pyniaid jong katei ka skul, ki la pan map na ki bahaiing- hasem jong kitei ki khynnah skul kiba la shah pynshitom ha kitei ki nonghikai ha katei ka rukom kaba bakla bad ki la pyntip ruh ba la dep ban pynsangeh treikam shipor ia kitei ki nonghikai kiba leh ia katei ka kam.
Kumba la ioh jingtip mynta, la ong ba ki seng pyrshah, ki la dawa ba dei ban weng kam noh shi syndon ia kitei ki nonghikai kiba pyni bor bad ki bym kheiñ shuh ia ka raiñ ka rem jong ki khynnah skul da kaba pyndonkam bakla ia ka bor jongki hapoh ka skul.
