Shillong, Nailar 31
Ka University of Science and Technology Meghalaya (USTM) ha ka sngi Palei ka la ïoh ban pynkup burom ïa ki samla pule jong kane ka skul bah kiba la pyndep ïa ki jingpule lyngba ka 9th Convocation.
Kine ki samla kiba la shah pynkup burom ki long haduh 1655 ngut ki samla pule Graduates bad 14 ngut ki Scholars ha ryngkat bad ka PhD.
Ha kane ka sngi, u Lat ka jylla u Phagu Chauhan u la ïadon lang ban shim bynta ha kane ka Convocation bad u la pynkup burom ruh da ka Honorary Degree of Doctor of Letters (Hon. D. Litt.) ïa u L Roy bad u Tarique Chauhan.
Haba kren ha kane ka sngi, u Lat ka jylla u la ïaroh ïa ka USTM haba ïadei bad ka jingshakri ha ka liang ka pule puthi bad ka jingpynshlur ïa ki samla ban shim bynta ha ka jingwad bniah (Research).
Ha kajuh ka por na ka liang jong u Lat u la ai ruh ka jingïaroh ïa ka USTM kaba la lah ban pyllait haduh 96 tylli ki kot bad 222 ki jingwad bniah (Research) kiba la ïoh ka jingithuh ha kylleng ka ri India bad ka pyrthei baroh kawei.
U Lat u la ïaroh ruh ïa ka jinglong ba kloi jong kane ka jaka pule kaba ai ïa ka jingpule khlem donkam siew ïa ki samla khamtam ïa kito kiba wan na ki longïing baduk. Nalor kata, u la buh ruh ka jingkyntu ïa kane ka skul bah ba kan nang trei bha shuh shuh haba ïadei bad ka jingshakri ha ka liang ka pule puthi.
Kiwei ki khusnam ba la sam ha kane ka sngi ki kynthup, Visitor’s Best Award sha ka Lipavi Yepthomi, LLB, ka Dr. APJ Abdul Kalam Best PG Student Award sha ka Jhuma Khatun MA Rural Development, ka Chancellor’s Best award sha ka Khughali G Assumi MA Political Science bad ka PA Sangma Best Undergraduate Award sha u Atiqur Rahman B.Sc. Physics.
Nalor kane, ka USTM ka la sam haduh 24 tylli ki Gold Medal sha ki samla pule Postgraduates bad 22 tylli ki Gold Medal sha ki samla pule Undergraduate jong ki tnat pule bapher bapher.
