Pyongyang, Nailar:
Ka tnat shipai jong ka South Korea ha ka Sngi Balang ka la iathuh ba ka North Korea ka la pynher ‘namding bing sha ki bynta jong ka East Sea, ba la ju tip ruh kum ka ‘Sea of Japan’ bad ka North Korea ka la leh ia kane wat hapdeng ka jingkilan jong ki shipai ka United States bad ka South Korea ha kine ki sngi.
La ong ba ka tnat shipai jong ka South Korea ka la siat bad pynher da kijuh hi ki jait ‘namding ‘Missile’ kiba la dep pynher ha kine ki por ba la leit, katba ka North Korea ka ju pyntip pat ba ka pyrshang ban pynher ia ki ‘namding ba thymmai jongka.
La ong ba ka United States bad ka South Korea ki dang bteng ia ka jing pynkilan ia ki tnat shipai haduh kine ki sngi bad katei ka jingiatrei lang jong kine ki arliang ri, ka la pyn bitar ia ka North Korea namar ka North Korea ka kheiñ ba katei ka jing pynkilan ka long ka jing pynkhreh jong kitei ki 2 ri ban leit thombor ia ka North Korea ha kine ki sngi ban wan.
Ha katei ka jing pynkilan, la pyndonkam ruh da ki liengsuiñ pynhap bom B-1B jong ka US bad la pynher ia ki ha kylleng sawdong ki bynta jong ka Korea ha katei ka sngi.
Kumjuh ruh ha ka Sngi Ba-ar, la ong ba ka United States, ka South Korea bad ka Japan ki la iasnoh tki lang ban pynkilan bad ban ai pyntbit ia ki tnat shipai jongki naka bynta ki thma kiba lah ban wan jia hadien- habud bad ha ki por bym lah tip.
Ka Washington, South Korea bad ka Japan ki la sdang ban iatrei lang naka bynta ban pynkhlaiñ ia ki tnat shipai jongki khamtam haba iadei bad ki jingma kiba ap na ka jing pynher ‘namding ba khah-khah jong ka North Korea ha kine ki sngi.
Ha ka taiew ba la lah, ka North Korea ka la pyrshang ban leit buh ia ki kor satellite ‘Spy Satellite’ ha kaba katei ka jingpyrshang ka la pulom noh bad ka Pyongyang ka la pyntip ba shen kan sa pyrshang ban pyn-urlong biang ia kane ka kam ha u Risaw jong une hi u snem.
Shuh shuh ruh la ong ba wat hapdeng ki jingmaham jong ka United States bad ka South Korea ia ka North Korea ba kan sangeh noh ia ka jingpynher ‘namding ba khah-khah naduh ki por ba la leit, hynrei la ong ba ka North Korea kam shym pynsngap wat tang shiliang shkor ruh bad kumta ka ju pynher ‘namding na ka por sha ka por bad kane ka ju wanrah jingma ia ki para ri ba marjan badka namar ka jing khlaiñ pynher ‘namding jongka sha ki duriaw bad sha ki bynta khappud bad kiwei pat ki ri ba markhap.
