![U Nongsaiñ Hima - Khubor Khasi](https://unongsainhima.com/wp-content/uploads/2023/02/splash-screen-720x405.webp)
Shillong, Nailar 31
Ka Meghalaya High Court ha ka Sngi Palei ka la kynthoh ba kam don jingartatien ba ka bor jong ki ‘mafia’ ba pynïaid be-aiñ ïa u dewïong bad ki karkhana thang dewïong ha kane ka jylla ka long kaba ïar bad kaba khlaiñ bad kaba don lut ha man ki jaka.
Kane jingkynthoh ka High Court ka la ong ha ka sngi ba ka la kyntait ban phah tohkit biang halor ka jingïap jong u Sub-Inspector Bah Pearlystone J Marbaniang ha u snem 2015 ha Patharkhmah, Ri-Bhoi.
“Kam don jingartatien ba ka bor jong ki ‘mafia’ ba pynïaid ïa ki kam dewïong be-aiñ bad ki karkhana thang dewïong ha kane ka jylla ka long kaba ïar bad kaba khlaiñ bad kaba don lut ha man la ki jaka. Wat la ka la don ka jingkhang ban tih dewïong ha kane ka jylla, lait noh ka jingtih da kaba pyndonkam ïa ki kor ki bor katkum ka juk saïan, da ka National Green Tribunal bad ba la pynksan ruh da ka Supreme Court, ka jingtih dewïong be-aiñ ka dang bteng ha kane ka jylla,” la kynthoh ka High Court.
Ka la kynthoh ruh ba wat u briew uba don jingshitom ha ki khmat un ïohi beit ïa ki trok kit dewïong kiba bun ha ki surokbah ha Meghalaya. Hynrei ki bor sorkar, na ki daw ba ki kham tip bha ma ki, ki leh kum bym ïohi halor kine, la bynrap ka High Court.
“Ki hukum kiba na ka por sha ka por ba la pynmih da kane ka High Court ha ki 18 bnai kin pyni ïa ka jingbitar namar ka jingbym leh eiei jong ki bor sorkar. Mynta la shi bnai eiei, ka paw ba ka sorkar ka la sdang ban leh eiei tangba ki dei tang ki sienjam ban pynjai-jai ïa kane ka Court bad ym ban kem ïa ki ‘kingpin’ lane ki nongkyrshan saiñpyrthei jong ki heh khlieh kiba kamai pisa khlem don jingeh. Kane ka jingsniew ka paw ba ka kiew shaduh ki kyrdan ba shalor,” la ong ka High Court.
Ha kaba ïadei biang bad ka jingkhlad noh jong utei u heh pulit, ka High Court ka la ong ba kam don satia ka jingartatien ba ha ka step jong ka 24 tarik Kyllalyngkot, 2015, kumba 32 tylli ki trok kit dewïong, ba la suba ba u dei u dewïong ba la tih be-aiñ, ki la shah bat ha Patharkhmah Outpost.
“Kam don jingartatien ba ki trai jong kine ki 32 tylli ki trok lane ki trai jong u dewïong ba la kit da kine ki trok, ki don bor bha bad ha kawei na ki kaiphod, ka don ka bynta ba la kynthoh pyrshah ïa u Block Development Officer (BDO) jong kato ka jaka. Khlem jingartatien, ym shym la leh eiei pyrshah ïa une u BDO lane kiwei pat kiba lehse ki la bthah ïa utei u heh pulit ban leh ïa kaei kaba u la leh. Katba ka jinglong shukor jong ka kam khaïi dewïong ka dei kaba baroh ki ïohi, hynrei ka long pat kaba eh ban ong ba uwei lane shi kynhun ki briew kiba la don bynta bad kitei ki trok ba la shah bat (32 tylli ki trok) ki lah ban donkti ban shim ïa ka jingim jong utei u heh pulit,” la bynrap ka High Court.