Shillong, Naitung 29
U Symbud Myntri Rangbah ka Jylla uba khmih ïa ka tnad PWD (Roads) Bah Prestone Tynsong ha ka sngi Balang u la ong ba ïa ka bynta jong ka surok Shillong-Dawki kaba la julor, la khmih lynti ban pyntreikam noh hapoh jong ka shi taïew.
U Bah Prestone u la ong ba ïa ka surok Sub-Way la tei ha ka bynta ha kaba ka la don ka jingshah rong noh jong ka surok bad ka kam pyntrei ïa kane ka bynta ka la don ha ka wat kaba khatduh.
“Nga dap da ka jingkmen ban pyntip ba ka jingshna ïa ka Sub-Way ka la jan dep lut bad mynta ka la don ha ka wat kaba khatduh. Ki kam kila ïaid step bad miet bad nga thikna bad don jingkyrmen ba hapoh ka shi taïew, ngin sa lah ban pyndonkam biang ïa ka surok Shillong-Dawki,” la ong u Bah Prestone ha ki nongthoh khubor.
Katkum ka jingong u Symbud Myntri Rang-bah, la dep ban bthah ïa ka NHIDCL bad ïa ki bor kiba dei khmih ban trei ïa katei ka kam.
U la bynrap ba u la ïakren man la ka por bad ki bor pynïaid district, u DC, SDO Civil bad ki ophisar jong ka PWD ban khmih bniah ïa ka jinglong jingman jong ki kam ki jam.
U Symbud Myntri Rangbah u la pynshai ba ka projek surok Shillong-Dawki ka dei ka projek kaba la pyntreikam da ka Sorkar India lyngba ka NHIDCL hapoh jong ka Ministry of Road Transport and Highways bad kam dei satia hapoh ka jingkhmih ka Sorkar Jylla.
“Hynrei na ka liang ka jong ngi, na ka liang ka Sorkar Jylla bad ka tnad PWD, ngi dang ïatreilang bad ka NHIDCL. Ïa kino-kino ki mat ne jingeh kiba ka don, ki bor district ki ju leit ban tuklar. Kane ka dei ka kamram jong ka Sorkar Jylla,” u la ong.
“Ngi la dep ban pynpaw hakhmat ka jong ki bad ngi la dep ong ïa ki ba ki dei ban pynthikna ba ka jingïaid jong ki kam ka dei ban long kaba pynhun,” ong u Bah Prestone.
