Shillong, Naitung 29
Ka jingïaid bun palat ki trok ka la pynlong ïa ki paidbah ba kin mad jingeh khamtam haba la poi ha ki bynta ba ka Sorkar ka dang shna thymmai ïa ka surok narum Phlangwanbroi East Khasi Hills ter-ter shaduh Ranikor kaba hap ha South West Khasi Hills District namar ki kali kiba thmu ban leit sha Mawsynram bad Shillong ki la sahkut beit da ki kynta.
Ka jingsdang shna ïa kane ka surok ka la dei naduh u bnai Ïaïong 2026 kaba la ïaid shaid-shaid mynta haneng ka Riatmawñiuh bad sharum ka Riatmawñiuh.
Haba ki paidbah ki la dap da ka jingkmen haba ka Sorkar ka la sdang shna thymmai ïa ka surok hynrei ki la ïakynduh jingeh namar ka la thut ka leit ka wan namar ka jingbun palat ki trok kit coke kiba kiew bad hiar na Nongjri, South West Khasi Hills District kiba ïaid na kane ka surok Balat, Mawsynram shaduh Weiloi.
Kaba kham slem ka jingsahkut kali ka dei ruh ha ki bynta ba shna ïa ka surok khamtam ha ka por mynstep haba ki bun ki kali kiba kiew ban leit sha Shillong bad ha ka por janmiet haba wanphai na Shillong.
Haba ïoh ban ïakren bad ki riew paidbah ki la pynpaw ba lada dei tang ban shna ka company ïa ka surok kam da thut than ka leit ka wan jong ki namar ki lah ban ap lada kim pat ïoh jaka ban kynriah hynrei shisien ba la ïaid ki trok ka la slem namar ki don ki jaka ba ki ïaid lang ha ka juh ka por.
Ki paidbah ki pynpaw ba ka don jingma namar kane ka surok nalor ba ka riat, lada ki ïakynduh ha jaka ba khapngiah ka shem shitom ban pyllait ïa ka jingsahkut kali namar ki hap ban ïaid da phikir.
Kumta ki la kyrpad ïa ki bor Sorkar lada ki shah ban ïaid ïa ki trok ki dei ban ïaid katkum ka por khnang ban nym ktah ïa ka leit ka wan jong ki paidbah.
Ki la pynpaw ba don ki por ba ki trok ki sniew hapdeng shiteng lynti khamtam ha jaka ba long kynjah ka buh jingeh ïa ki paidbah khamtam ha ka miet ka ïong.
Kumban shu pynkynmaw ïa kane ka surok na Phlangwanbroi sha Ranikor kaba jngai kumba 47 kilometre la mang pisa haduh 265 klur tyngka, katba ïa ka jingkieng Umpung la mang pisa da kawei ka project.
Lah ban pynkynmaw ba kane ka surok ka dei kaba la slem bha ki paidbah ki ju angnud ban shna pynbha namar katba maramot tang hadien 6 bnai ka la sniew biang khamtam lada ïaid ki trok hynrei ki paidbah ki kyrmen ba lada ïa kane ka surok kaba la shna da ka company kan long kaba bha, kaba skhem kan kham pynkloi ban leit sha Mawsynram bad sha Shillong.
