Shillong, Naitung 29:
U MDC ka Laban Mawprem Constituency Bah Ricky Shullai u la ong ba um pyrshah ïa ka roi ka par haba wan hapoh ka Constituency hynrei kum u nongmihkhmat ba la jied da ki paidbah um kwah ba ka roi ka par kan ktah ïa ka umbam umdih.
Kane ka jingpynpaw u Bah Ricky Shullai ka dei namar ka jingshna ïa ka Ropeway ha u Lum Shillong ka la ktah ïa ki umbam umdih hadien ba la pynkhyllem ïa ki dieng.
U la pynpaw ba ïa kane ka jingpyrshah u la dep thoh sha u Myntri Rangbah ka Jylla u Conrad K Sangma hynrei haduh mynta um shym la ïoh jubab.
Shuh shuh u la bynrap ba wat u Acting Syiem ka Hima Mylliem u la bthah ïa kane ka company Meghalaya Ropeway Development Authority (MRDA) ba kan shim ïa ka No Objection Certificate (NOC) na ka 11 Kur jong ka Raid Mylliem.
U Bah Ricky u la ong ba kane ka company kam shym la burom wat ïa ka KHADC namar kam shym la pan laisen khaïi.
U la ban biang ba naduh ba wan kane ka project ym shym la don ka jingïasyllok bad ki riew paidbah hynrei la shu ïohi ba la pynkhyllem ïa ki dieng kiba don ha tnad khlaw jong ka Sorkar Jylla.
