Shillong, Naitung 29
Ka Hynñiewtrep Youths’ Council (HYC) ha Sngi Balang ka la leit ban aiti da ka jingthoh sha u Lat ka Jylla u C.H. Vijayashankar haba ïadei ka jingïaid lait ka tnad pule puthi ka Sorkar Pdeng ïa ki kyndon haba ïadei ka jingthung ïa u Vice-Chancellor ba shipor jong ka North-Eastern Hill University (NEHU) kata ïa u Prof. Dr. Saroj Kanta Barik.
Haba kren sha ki nongthoh khubor u Bah Roy Kupar Synrem President HYC u la ong ba katkum ka Statute 2 (A) Clause 2 jong ka NEHU ka kdew ba tang u nonghikai ba la shakri slem duh u lah ban shim ïa ka kam kum u Vice-Chancellor ba shipor, katba ym pat lah ban ïoh ïa u VC ba pura jong ka Skulbah.
U la kdew ba ka tnad pule puthi ka Sorkar Pdeng ka la pynmih ïa ka hukum ha ka 22 tarik Naitung 2026 ba ka President jong ka Ri India ka la thung ïa u Prof. Dr. Barik ban long u VC ba shipor jong ka Skulbah NEHU, ha kaba u la kdew ba u Prof. Dr. Barik u dei u ba wan ba-ar ha ka jingai jingshakri slem hapoh ka Skulbah.
U Bah Roy u la kynnoh ba kane ka jingleh ka tnad pule puthi ka Sorkar Pdeng ka long pyrshah ïa ka kyndon jong ka NEHU bad ka tnad kam lah ban ïaidlait ïa ki kyndon ba la don lypa hapoh jong ka Skulbah.
U la ban jur ba kino-kino ki bor ki dei ban bud ne ban pyntreikam ïa ki kyndon ka NEHU. “Baroh shi katta ngi kwah ba ka NEHU kan pyntreikam katkum ka NEHU Act 1973 ha ka ban pynïaid beit pynïaid ryntih ïa ki kam hapoh ka Skulbah, hynrei ka jingthung ïa u VC ba shipor la pynkheiñ ïa ki kyndon jong ka NEHU” la ong u Bah Roy.
U la pynpaw ba na ka liang ka HYC ka ban jur ïa u Lat ka Jylla ba un shimkhia ban pyntip ïa kane sha ki bor ba dei peit lane sha ka tnad pule puthi ka Sorkar Pdeng kumjuh ïa ka President ka Ri ba dei ban pyntreikam ïa ki kyndon haba ïadei ka jingthung VC ba shipor hapoh NEHU bad kdew ruh ba don uwei pat u nonghikai uba la shakri kham slem ban ïa u Prof. Dr. Barik bad une u dei hok ban shim ïa ka kam ban long kum u VC ba shipor jong ka Skulbah.
