Shillong, Naitung 29
U Symbud Myntri Rangbah ka Jylla Bah Prestone Tynsong ha ka sngi Balang u la ong ba ka Sorkar India kala ai ka jingkular ïa ka kynhun na Meghalaya ba kan sa pynkylla ïa ki kyndon bala tyrwa ha ka FCRA Amendment Bill kiba ktah ïa ka jingtreikam ki Balang ha ka thaiñ Shatei Lam-Mihngi khamtam ha Meghalaya.
Haba kren sha ki nongthoh khubor, u Bah Prestone u la ong ba u Myntri Rangbah Conrad K Sangma u la ïalam dang shen ïa ka kynhun ki nongïalam Balang sha Delhi ban ïakynduh ïa ki nongïalam ka Sorkar Pdeng halor kane ka kam.
“U Myntri Rangbah u la ïalam ïa ka kynhun sha Delhi bad ïakynduh ïa katto katne ki nongïalam ka Sorkar Pdeng. Kila kular ïa ka kynhun ba kin sa pynkylla ïa ki kyndon jong ka amendment bill kiba ktah ïa ka jingtreikam ki balang ha ka thaiñ Shatei Lam-Mihngi khamtam ha Meghalaya,” ong u Bah Prestone bad bynrap ba um pat don jingtip pat ïa mynta la ka Sorkar Pdeng kala wanrah ne em ïa ka jingpynkylla.
Haba pynshai ïa ka jingtreikam jong kane ka aiñ, u Bah Prestone u la ong ba ka FCRA kam treikam satia tang ïa ki jaka treikam jong ki Khristan.
“Peit shane, ka FCRA kam mut ba dei tang ïa ki Khristan. Phi hap ban sngewthuh ïa kata. Ka FCRA ka dei ïa ki seng bapher-bapher. Ka treikam ha baroh kawei ka ri,” u la ong.
“Ka jingsngewkhia jong ngi hi ka long ha ka liang ki Khristan bad ngi la dep pynsngew ïa kane ka jingeh bad ngi la dep tyrwa ruh ïa ka jingpynkylla. Kumba nga ong, nga dang ap ban ïoh ïa ka jingtip la ïa ki kyndon ba ngi la aiti sha ka Sorkar India la dep mynjur ne em. Tad hadien ba nga la ïoh jingtip, ngam pat lah ban ïathuh eiei ïa phi”.
Halor ka jingkylli la ka Sorkar Jylla kan pyrshah ïa ka bill, u Bah Prestone u la pynpaw ba ka dang kloi palat ban shim ïa ka nongrim halor kane.
