Shillong, Naitung 29
Ka Voice of People Party, State Youth Wing ha ka Sngi Balang ka la leit ban pan jingshai na ka ophis Shillong Municipal Board (SMB) halor kumno uwei u bar Jylla u ïoh jingbit ban shong die jingdie ha ka jaka ba la ïoh da kawei ka kynthei Khasi ha Jail Road.
Haba kren sha ki nongthoh khubor u samla Nathaniel Mawrie, Secretary VPP Youth Wing u la ïathuh ba katkum ki kot ki sla jingpynshisha ba la ïoh na ophis Municipal katei ka kynthei ka la ïoh jingithuh naduh u snem 2024 katba utei u bar Jylla pat u dang ïoh ïa ka jingpynshisha na ka Municipal ha u snem 2025.
U la kynnoh ba ka jingpyrshang u bar Jylla ban ai da ka pisa sha katei ka kynthei Khasi ka pynsuba sniew wat ïa ka jingïoh jingithuh jong u napoh ka ophis Municipal ba lehse ka lah ban dei ba u ai pisa ïa ki briew jong ka ophis.
Haba ïadei bad kane, u samla Nathaniel u la ïathuh ba ki la ïoh ïakynduh ïa u Bah F.B Chyne u ba long u Executive Engineer ka Municipal bad ban kyntu ïa ka ophis ba kan pynlong ïa ka jingpeit bniah ïa ki kot ki sla ban pynbeit ïa kane ka kam.
Haba bynrap ïa kane, u la ong ba ka VPP Youth Wing kan ym shong thait ban trei bad ban mih shakhmat ban pynsngew ïa ka sur jong ki paidbah kiba ym da don than ka sur ban pynsngew sha ka Sorkar bad kyntu ïa kiba don ha ka bor ban trei hok ïa ka kam khnang ba kiba dei hok ban ïoh dukan kin ïoh ban shong die jingdie.
