Shillong, Nailur 01
Ka jaka ïeng kali ha Khlieh Ïewduh ka long shisha kaba sma bad kaba jaboh namar ka sorkar jylla haduh mynta kam shym la lah ban wanrah ïa ka jingkhuid jingsuba na ka bynta ki nongdie nongthied bad ïa kiba wan pynhap mar la ka long napoh ka jylla ne nabar kumjuh.
Kane ym tang ba ka ktah ïa ka koit ka khiah ki briew, hynrei kane ka jaka ïeng kali kaba ka sorkar ka ju lum khajna kham bun ka pisa man ka sngi kam shym la lah ban pynbiang ka jingshai ne ka bording ban pynthaba ha ka por mynmiet kaba la pynlong ïa ki nongtuh ban shim kabu ban leit tuh ïa ki dohkha kiba wan pynhap na Andhra Pradesh.
Namar ka jingbym don jingshai ha ka por mynmiet ki nongtuh ki ju wan riehtngen ha kane ka jaka da kaba wan shong dih kynja bad drok.
Nalor bym don jingshai ha ka por mynmiet, kane ka jaka kam don ruh wat ïa ka um kaba biang, kam don ïa ka paiñkhana kaba biang, kaba la pynlong ïa ki briew ban leit shabar pathar kat shaba lap.
Kaba kham sma bha ka dei ka jaka pynhap ïa ki dohkha kiba wan na Andhra Pradesh namar ka jaka pyllait ïa ka um ka don tang ar tylli ki nala, hynrei ha ka por ba jur slap ka um ka poi haduh khohwah.
Ki kali kiba ju pynïeng ha kane ka jaka bad kiba wan die wan thied kim nud ban shong palat ïa ka 9 baje janmiet namar kam long shngaiñ haba ym don jingshai.
Kane ka jingleit wad jingtip U Nongsaiñ Hima ïa ka jinglong jingman ka jaka ïeng kali ha Khlieh Ïewduh ka dei namar u Chief Executive Member ka KHADC, Bah Pynïaid Syiem, u majistor, ki pulit bad u Syiem ka Hima Mylliem kim nud ban rung ha kane ka jaka ïeng kali namar ka sma palat kaba dei ha ka 29 tarik Nailar 2023.
Haba ïakren bad ki nongpynïaid ïa ki dohkha ki la ïathuh ba kim banse ban bamja bad shong ha jaka ieng kali hapdeng ka jingsma namar ka sorkar kam pyrkhat ïa ka jingkoit jingkhïah jong ki nongshong iew.
Ki la pynpaw ba kaei ka jingmut ba ka sorkar ka wan shna dukan biang hajrong ka kynroh haba khlem lah ban wanrah ïa ka jingkhuid jingsuba.
“Ngi kyrpad ïa ka sorkar kumba ngi la siew ïa ka khajna ka dei ban buh ïa ki jingshai khnang ba ki nongtuh kin kham lehraiñ namar ki nongñiah trok kiba nabar ka jylla kim nud ban mih lada ki ïohi pylleiñ-pylleiñ ïa ki nongtuh” ki la ong.
Kiwei pat kiba shong die jingdie ha kane ka jaka ki la pynpaw ba ki ñiut kiba la buh shi jaka ki hap shah ïa ka jingsma namar la wan kit shisien shi taïew.
Nangta ka um ha paiñkhana ki hap ban shu thied ban buh ha ki top bad ki phong ba ju wan kit dohkha namar ka sorkar kam shym la lah ban pynbiang ïa ka um na ka bynta ka jingbiang jong ki paidbah.
