Shillong, Nailur 01
Ka Hynñiewtrep Integrated Territorial Organisation (HITO) sengkmie ha ryngkat bad ka HITO Nongthymmai Area mynta ka sngi ka 1 tarik u Nailur 2023 ka la leit ban aiti da ka dorkhas ha u Chief Executive Member (CEM) ka Khasi Hills Autonomous District Council (KHADC), Bah Pynïaid Sing Syiem halor ka jingdawa ba dei ban pynbeit bad pynduh ïa ka jingai beaiñ ïa ki Trading License sha ki bar jylla ha Them Rynjah kaba hap hapoh ka Rynjah Dorbar Shnong lyngba ki society ba la ai bor bad soi da u Bah A.L Hek bad Bah Sanbor Shullai ha u snem 2007.
Haba kren sha ki lad pathai khubor hadien ka jingwan ïakynduh ïa u CEM, u President ka HITO, Bah Donbok Dkhar u la ong ba ka jingwan kynduh jong ka seng ïa u CEM ka KHADC ka long ban pan jingshai ha kaba ïadei bad ka jingai NOC ka R&R Colony Welfare Society ïa ki bar jylla ban ïoh ïa ki Trading License ban seng ïa ki dukan bapher bapher hapoh ka thaiñ Rynjah.
U Bah Donbok u la ïathuh ba ka seng ka la ïoh jingtip ba ki don shibun ki bar jylla kiba la ïoh Trading License na ka R&R Colony Welfare Society bad ha ka jingleit khynra Trading License da ka seng la lap ba katei ka society ka la donkti ban ai NOC sha ki nongkhaïi bar jylla ban pan Trading License bad ym na ka Council.
U Bah Donbok u la ïathuh ba ha u snem 2007, ka R&R Colony Welfare Society ka la pynmih ïa ka ‘Resolution’ ba la soi lang da u MLA, kata u Bah A.L Hek bad da u MDC u Bah Sanbor Shullai ha katei ka por bad kane ka ‘Resolution’ ka ai bor ïa katei ka society ban ai NOC ïa ki briew kiba sah ha katei ka jaka ban ïoh ïa ka Trading License.
U Bah Donbok u la ïathuh ruh ba ha ka por ba ka seng ka la leit ban khynra, u la don uwei u briew uba kam ïalade kum u Inspector napoh ka KHADC ha kaba u la phone ïa ki dkhot ka seng ban wan ïakynduh ïa u bad na ka liang u Bah Donbok u la byrngem kylla ïa kitei ki jait briew ba kum ka seng kan sa phngian kylla da ka pisa ïa kitei ki jait briew kiba pyrshang ban pynbam pisa ïa ki dkhot jong ka.
U la ong ba kum ka seng kan nym ailad bad pdiang ïa kum kitei ki jait briew kiba thmu ban pynbiej ïa ki dkhot ka seng da ka pisa hynrei un thep kylla ïa kitei ki nongpynbiej da ka pisa.
U Bah Donbok u la ong ba ka jingsoi jong u Bah Sanbor Shullai ïa ka ‘Resolution’ ha u snem 2007 ban ai shnong ïa ka RR Colony lem bad u Bah AL Hek, u MLA ha katei ka por ha ryngkat bad u Ushanta Kumar Das kum u Rangbah Shnong ha u snem 2007 ka dei tang ka buit ban jop ilekshon jong ki ha katei ka por khlem da sngewthuh bad tip ïa ki kyndon ka United Khasi Jaiñtia Hills Autonomous District Appointment and Succession of Chiefs and Headmen Act 1959.
U la ong ba katkum ka jingpeit ïa ka Mylliem Act, 1959 ka kren shai ba kino kino ki jaka kiba dang hap hapoh ka Schedule Area ki dang hap hapoh ka Mylliem Syiemship kaba mut ba ka R&R Colony ka dei ka Them Rynjah ym ka R&R Colony kumba la kam da ki Society bad katkum ba la soi da ki nongsoi ha ka ‘Resolution’
“Ka R&R Colony ka hap ha ka jingpeit da ka Rynjah Dorbar Shnong ba la ai bor da ka Mylliem Syiemship bad dei namar kane ka jingai NOC ka R&R Colony Welfare Society ka long beaiñ bad ka long pyrshah ïa ka Mylliem Act 2007 and Rules 2015 ba la mynjur da ma KHADC”, la ong u Bah Donbok.
U Bah Donbok u la ïathuh ba ha ka jingïalang, ka seng ka la dawa na u CEM ban don da ka jingtohkit kaba kham bniah bad ban khot hajir ïa ka Dorbar Shnong Rynjah ban pynshai. Kumno kane ka Society ka ïohbor ban ai NOC ïa ki briew kiba sah hapoh ka R&R Colony bad u la ïathuh ba shen ka EC jong ka KHADC kan sa pynmih ïa ka jingpynbna ba ïa ka NOC yn lah ban ai tang da ka Dorbar Shnong jong ka Rynjah ym da ka Society.
