Shillong, Nailur 01
Ka North Eastern Hill University Teachers’ Association (NEHUTA) ka la rai ban phah jingthoh sha ka President ka Ri, kaba long ruh ka nongwan jngoh jong ka skulbah, ophis u Myntri Rangbahduh ka ri nalor kiwei-kiwei pyrshah ïa u Vice-Chancellor (VC) ka skulbah, Prof. P.S. Shukla halor ka jingpynkheiñ jong u ïa ka aiñ ka NEHU, ki ‘Statute’ lem bad ki ‘Ordinance’.
Kane ka la wan ruh hadien ka jingkut noh ka jingai por ba 5 sngi jong ka seng ïa u VC ban weng noh ïa ka shithi kaba la pynmih ha ka 12 tarik u Naitung, 2023 haba ïadei bad ka jingpyntreikam ïa ka National Education Policy (NEP) 2020, na bynta ka samoi pule 2023-24.
Ka shithi kaba la kdew da ka NEHUTA ka dei kaba la phah da u Officer on Special Duty (OSD), u Debashih Chowdhury sha ki Principal jong ki kolej kiba pynïasoh bad ka skulbah ban ïaid shakhmat bad ka jingpyntreikam ïa ka NEP lyngba ka ‘Four-Year Undergraduate Programme’ (FYUP) naduh ka jingsdang jong ka samoi pule 2023-24 – kaba ka seng ka sngew ba ka ïalam bakla bad kam ïahap.
“Ngi la ïaid shakhmat bad ka jingpynkhreh bad shen ngin phah noh da ka jingthoh sha Delhi ba kynthup sha ka President ka India, kaba dei ruh ka nongwan jngoh jong ka skulbah, ka Droupadi Murmu, ophis u Myntri Rangbahduh ka ri, Myntri ka tnad pule-puthi ka Sorkar Pdeng, u Dharmendra Pradhan, Myntri ka tnad pla tyngka ka Sorkar Pdeng, ka Nirmala Sitharaman, Lat ka Jylla, u Phagu Chauhan, uba dei u Chief Rector ka skulbah, Myntri Rangbah ka Jylla, Conrad K. Sangma bad kiwei-kiwei,” la ong u President ka NEHUTA, Prof. Lakhon Kma ha ka Sngi Thohdieng.
U la ong ruh ba ka seng nangne shakhmat kan ym ïashim bynta shuh ha ki jingïalang jong ka Academic Council (AC) bad kan ym don bynta eiei ha ka ban pynkhreh ïa ki jingkylli na bynta ki sobjek pule jong ka ‘1st Semester’ katkum ka ‘Syllabus’ ka NEP.
Katkum ka jingïathuh u Prof. Kma, baroh ki dkhot ka NEHUTA ki la kiar ban pynkhreh ïa ki jingkylli jong ka ‘1st Semester’ hapoh ka jingpyntreikam be-aiñ ïa ka NEP ha ka kyrdan pule ‘Undergraduate’ (UG) na bynta ki sobjek bapher-bapher kumba la rai da ka ‘General Body Meeting’ (GBM) jong ka seng.
U la kdew ruh ba na ka liang ka AC haduh mynta kam pat rai haba ïadei bad ka mat jong ki ‘Model Question Paper’ (MQP) hapoh ka NEP na bynta ka kyrdan pule UG kaba long kaba donkam katkum ka ‘Ordinance’ ka NEHU khnang ba kan don ka jingïaid beit ïaid ryntih ha ka rukom pynkhreh jingkylli ha baroh ki sobjek.
“Ha ka jingbym don ki MQP, ym don nonghikai ba lah ban pynkhreh ïa ki jingkylli bad kumta ym lah ban ïaid shakhmat. Khlem kine ki kyndon, ki eksamin ha ka kyrdan UG na bynta ka ‘1st Semester’ katkum ka NEP kin ym treikam katkum ka aiñ,” u la ong.
Ha kajuh ka por, u la pynsngew ba kane ka long sa kawei ka nuksa jong ka jinglong kyrkieh ka NEHU ban pyntreikam be-aiñ ïa ka NEP naba kam pat long kaba la khreh ban pyntreikam pura ïa ka (NEP) namar ka jingbym don ka jingïamir jingmut halor ka MQP ha ka AC, ‘Syllabus’ jong baroh ki sobjek naduh ka 3rd haduh 8th ‘Semester’ kaba hap pynkhreh, ïamir jingmut bad mynjur da ki ‘Board of Studies’ jong ki tnad pule bapher-bapher bad ki ‘School Board’ bad ïakren ne mynjur ha ka AC.
“Ka long ka lynti kaba jrong…kumta phim lah ban pyntreikam kyrkieh bad be-aiñ ïa ka NEP. Baroh kine ki long kiba donkam katkum ki ‘Statute’ bad ‘Ordinance’ ka NEHU. Khlem kine ki kyndon ba donkam, ka NEP ha ka kyrdan pule UG ha ki kolej ba la pynïasoh kan ym treikam, bad ktah ïa ka lawei jong ki samla pule ‘1st Semester’,” la ong u President.
