Shillong, Nailur 01
U Myntri ka Sorkar Jylla, Bah A.L Hek u la pynksan ïa ka jingtreikam jong ka Relief and Rehabilitation Colony Welfare Society bad u la ong ba kane ka Society ka ai syrnot nongshong shnong (residential certificate) wat ïa u ruh.
Kane ka jingpynksan u Bah Hek ka la wan ha ka por ba la paw pyrthei ki kot ki sla ha kaba ma u ruh u la donbynta ban ïasoi lang ïa ka rai lane ka ‘resolution’ ha u snem 2007 haba ïadei bad ka jingdon kane ka Society kaba don ruh ïa u Rangbah Shnong.
Ha ka jingshisha ka KHADC ka la pynskhem ïa ka jingpynbna jong ka Hima Mylliem ha u snem 2019 ba ka Relief & Rehabilitation Colony ka hap hapoh u pud synshar jong ka Dorbar Shnong Rynjah.
Haba ki nongthoh khubor ki buh jingkylli halor ka jingai syrnot bad NOC da ka Society ban ïoh laisen khaïi ha katei ka jaka, u Bah Hek u la ong ba kane ka Society ka la don naduh mynshwa bad ka ai ruh ïa ka syrnot nongshong shnong.
“Kumba uba shong ha RR Colony nga sngewthuh bha ïa ka jinglong jingman bad manga ruh nga ïoh ïa ka syrnot nongshong shnong na ka RR Colony Welfare Society,” la ong u Bah Hek.
U Bah Hek u la ong ba ka RR Colony Welfare Society ka ai NOC bad syrnot nongshong shnong ruh hynrei ka shong ha ka District Council bad ka Sorkar la kan pdiang ne em ïa kata.
Haba kylli, hato kam dei mo ba hap shim ïa ki kot ki sla bad NOC na ka Dorbar Shnong namarba ka RR Colony Welfare Society ka dei tang ka Society, u Bah Hek u la ong pynban ba baroh ki kam la pynïaid da ka Society naduh ka jingsiew ïa ka bai bording ilektrik, ka bai um, bad jingai syrnot nongshong shnong.
U la ong ba ka RR Colony Welfare Society kam don Rangbah Shnong hynrei ka don u President bad General Secretary.
Wat la u Bah Hek u la ong ba ym don Rangbah Shnong, hynrei ha ka resolution jong u snem 2007 kaba la soi lang da u Bah Hek lem bad u Bah Sanbor Shullai ha ka por ba u long kum u Executive Member ka tnat Trade ka KHADC, ka la paw ba u don u Rangbah Shnong ka RR Colony uba kyrteng u Ushanta Kumar Das.
Ka KHADC lyngba u CEM, Bah Pynïaid Sing Syiem ka la kren shai ba ïa ka jingdon kata ka Society ym don kano-kano ka jingwit khamtam ki kam kiba ïadei bad ka niam, hynrei u pud synshar bad ki kot ki sla kiba dei ban ai, kane ka Society kam lah satia, hynrei ka dei ka kam kaba hap hapoh ka jingpeit jong ka Dorbar Shnong.
Ka KHADC ka la ong ba ka ithuh ruh ïa ki kot ki sla kiba ai da ka Dorbar Shnong Rynjah namar ka RR Colony ka don ha Rynjah.
Na ka liang ka Khun Hynñiewtrep National Awakening Movement (KHNAM) ka la ai jingmut ïa ka Khasi Hills Autonomous District Council (KHADC) ban pan jingshai na u Myntri Sorkar Bah A.L Hek bad u MLA ka South Shillong Bah Sanbor Shullai halor kano ka bor kaba ki la ithuh ïa ka jingthung ïa u bym dei Khasi kum u Rangbah Shnong bad ka jingailad ïa kiba sah ha R&R Colony ban don la ka jong ka jingsynshar.
U Working President ka KHNAM, Bah Thomas Passah u la ong ba dang shen la paw ba ka jingai laisen khaïi da ka KHADC ha ki snem kiba mynshwa ka dei halor ka NOC ba la ai da ka Relief and Rehabilitation Colony Welfare Society bad la soi da u Rangbah Shnong u bym dei Khasi.
Ka KHNAM ka la ong ba ka long kaba shai kdar katkum ka Khasi Hills Autonomous District (Appointment and Succession of Syiem, Deputy Syiem, Electors and Rangbah Shnong of Mylliem Syiemship) Act, 2007” ba kam ithuh ïa ki bym dei Khasi ban long Rangbah Shnong bad kaei kaba paw ka long ba ka don ka rai (resolution) kaba la soi da u Executive Member barim ka KHADC, Bah Sanbor Shullai bad Bah A.L Hek kiba la shah ban ai NOC.
U la ong ba ka Dorbar Shnong Rynjah ka la kren shai ba naduh 2019 ïa ka R&R Colony la tip kum ka Them Rynjah bad ïa ka NOC dei ban ai da ka Dorbar Shnong Rynjah.
Ka KHNAM ka la ong ruh ba u CEM ka KHADC ruh u la pynshai kumjuh bad ka Council kam pdiang ïa ka NOC lait noh kaba ai da ka Dorbar Shnong Rynjah.
Hynrei naduh 2019 haduh 2023, ka dei halor ka NOC jongno ba la ai laisen ban khaïi bad ban pynthymmai ïa ki laisen khaïi namar dang shen kito kiba don dukan ki la ong ba ïa ka NOC la ai da ka Society.
Namarkata, ka KHNAM ka la ai jingmut ba ka KHADC ka dei ban ïoh ka jingpynshai na u Bah Hek bad Bah Sanbor Shullai.
