Shillong, Nailur 03
U Co-Chairman ka Garo State Movement Committee (GSMC), u Balkarin Ch. Marak, u la shah kem noh ha ki pulit ka West Garo Hills halor ka jingjia ïakynad ha Tura ha ka 24 tarik Naitung ha ka por ba u Myntri Rangbah, u Conrad K Sangma, u dang pynlong jingïalang bad ki seng kum ka ACHIK bad kiwei.
Katkum ka khubor na ki pulit, la ong ba u Balkarin u la shah kem hapdeng ka shiteng synñia bad ka step jong ka Sngi U Blei na ka shnong Bansamgre, East Garo Hills. Ki pulit ki la ong ba une u nongïalam ka GSMC u la phet rieh naduh ba ka Meghalaya High Court ka la kyntait ban ai jamin lypa ïa u bad arngut kiwei pat ban lait na ka jingshah kem. Ka jingslem ban ïoh kem ïa u Balkarin ka dei namar ka jingmih jong u na kawei ka jaka sha kawei pat ha kine ki sngi, la ong ki pulit.
Nalorkata, ki pulit ki la ong ba ka General Secretary ka ACHIK, ka Bernita Ch. Marak ka dang jah haduh mynta, bad ka jingthwet ïa ka ruh ka dang ïaid. Sa uwei pat u nongïalam ka ACHIK, u Laben Ch. Marak, uba dei ruh u ophisar MCS bad MPS barim, u la shah kem ha ki pulit ha kine ki khyndiat sngi halor katei kajuh jingjia.
Lah ban kdew ba ha ka 11 tarik Nailar, ka Meghalaya High Court ka la kyntait ban ai jamin lypa khnang ban lait shah kem ha ki pulit ïa ki lai ngut ki nongïalam ha ka jingshah thngan ha Tura bad kine ki kynthup ïa u ophisar MCS bad MPS barim, u Labenn Ch. Marak, u nongïalam ka Garo Hills State Movement Committee (GHSMC), u Balkarin Ch. Marak bad ka nongïalam ka ACHIK, ka Bernita R. Marak.
Kitei ki lai ngut ki la leit sha High Court ban pan ïa ka ‘Anticipatory Bail’ lane ka jamin ban lait shah kem hadien ka jingjia ha ka 24 tarik Naitung, 2023, ha kaba ka la mih ka jingkawang maw ïa ka shlem treikam u Myntri Rangbah, Conrad K Sangma, ha Tura katba u dang pynlong jingïakren bad ka ACHIK bad kiwei ki seng halor ka jingdawa ban pyntreikam ïa ka ‘Backlog Policy’ ha ka jingthung kam thung jam bad ban pynlong ïa ka Tura kum ka nongbah ka Meghalaya ha ka por tlang.
Ha ka 24 tarik Naitung, 2023, ki nongïalam ka ACHIK bad kiwei pat ki kynhun ki la ïakynduh ïa u Myntri Rangbah, u Myntri ka tnat PHE, u DC bad kiwei ki heh sorkar. Hynrei katba ka jingïalang ka dang ïaid, ki la don ki briew kiba la don shabar jong ka kamra jingïalang, kiba la pyrta shla bad kawang maw. Ha katei ka jingjia ki la don kumba 18 ngut ki pulit, Home Guard bad CRPF kiba la mynsaw katba 20 tylli ki kali sorkar bad kali shimet ki la shah pynjulor lane shah thang. La ong ruh ba ki la don kumba 500 ngut ki paidbah kiba la ïalum ha kane ka sngi shabar jong ka jaka ba pynlong jingïalang. Ha kaba ïadei bad kane ka jingjia, la pynrung ïa ka jingujor ha thanat Araimile (Case No, 16(07) 2023).
