Shillong, Nailur 03
Ha kine ki khyndiat sngi, ka Ïingbishar kaba halor ka Jylla (Meghalaya High Court) ka la khyrwit tyngeh ïa ka Sorkar halor ka jingsniew palat liam bad jingjot rathai ki surok ha kylleng ka Jylla kynthup ki surokbah (National Highway).
Haba phai sha ki surok kiba la dep siangrong thymmai ha kane ka Jylla lyngba ka PMGSY-II, kaba dei ka skhim kaba wan na ka Sorkar Pdeng, la sakhi ha ki katto katne ki jaka ba ki surok ki la jot bad pei thliew. Kane ka paw shynna ba ka rukom pyntrei ki kontraktor kam da biang ha kaba ka rukom siangrong ka long kaba stang wat lada ka dei ka skhim kaba wan na ka Sorkar Pdeng.
Kane ka rukom trei torti ka pynlong ïa ki paidbah ban suba sniew ba ki karikor (engineer) ka tnat shna surok ha kane ka Jylla kim shym la khmih bad peit bha ïa ka rukom pyntrei ïa ki surok haba siangrong thymmai, naduh ka rukom siangrong kaba stang ha kaba ka surok kam shan satia bad sdang jot noh tang hapdeng khyndiat bnai.
Ka jingkylli ka long, lano ki kontraktor kiba shna ïa kito ki surok kiba la jot kin shna biang ne maramot noh. Hato ka Sorkar ka nud ban leh eiei ïa kum kita ki kontraktor khamtam ban buh dak sniew noh ïa ki, ne kan ai kam shuh shuh ïa ki?
Ym kham da ïohsngew ba ki kontraktor kin shah pynshitom lada ki surok kiba ki shna kin jot ne sniew noh tang hapoh khyndiat bnai.
Ka PMGSY-II ka dei ka skhim jong ka Sorkar Pdeng. Ka por ka la dei ïa ki paidbah ban thoh da ka shithi ujor sha ka Sorkar Pdeng khnang ba kan pan jubab na ka Sorkar Jylla khamtam na ka tnat shna surok ha Meghalaya halor ka jingjot noh ki surok kiba la maramot bad siangrong thymmai lyngba ka PMGSY-II.
Ym lah pat ban len ba ki don ki kontraktor kiba trei bha bad ka rukom siangrong ïa ki surok ha ki katto katne ki jaka ka long kaba rben bad kham jlih. Ki don ki kontraktor kiba pyndonkam da ki mashin haba siangrong, bad ki don ruh ki kontraktor kiba siangrong da ki nongtrei, hynrei haba ki trei bha, ka rukom siangrong ruh ka skhem wat lada kim pyndonkam da ki mashin.
Ka skhim PMGSY ka ju don ka pisa kaba la mang bad bhah lypa na ka bynta san snem haba shna ïa ka surok. Kane ka pisa ka dei kaba la mang lypa ban maramot ïa ki surok PMGSY kiba la jot hapoh 5 snem lane ka ‘maintain fund.’
Hynrei ka jingkylli ka long, shano kata ka maintenance fund bad lano ki kontraktor kin maramot noh ïa kine ki surok kiba la jot tang hapdeng khyndiat bnai?
Kum ban shu kdew hangne, ka Ïingbishar dang shen ka la takraiñ tyngeh ïa ka tnat shna surok ka Jylla halor ka jingaidaw ïa ka jingjur slap haba ïadei bad ka jingjot ki surok ha kylleng ka Jylla bad buh jingkylli ïa ka rukom pyntrei ïa ki surok.
Aïu kan jia ïa ki kontraktor lada don kiba leit mudui sha Ïingbishar ban pynshitom ïa ki lada ki surok ki jot kloi na ka daw ka jingtrei torti.
