Mumbai:
Haduh 85,000 ki nongkyrshan jong u Shah Rukh kin sa shim bynta lang ha ka 7 tarik u Nailur ban rakhe ia ka jingpyllait paidbah ia ka phlim Jawan ha kaba ki nongkyrshan u SKR ki angnud ruh ba ka Jawan kan khring ia ki nongpeitkai kum ba long ka Pathaan bad pyn kheiñ ia ki rekod ha ka Box Office.
Sa shisien ki nongpeitkai kin sa ioh ban sakhi sa ia kawei de ka phlim bakhraw jong u SRK ka Jawan ha kaba ia kane ka phlim la direk da u Atlee bad kaba la ak lang ruh da ka Nayanthara.
Hadien ba la pyllait paidbah ia ka trailer jong katei ka phlim bun ki nongpeitkai ki la shah khring bad ha kajuh ka por don ruh ki nongkyrshan kiba la thmu ban leit peit ia kane ka phlim ha ka show kaba nyngkong kata ka long ha ka por 6 baje mynstep.
Ia ka Jawan yn sa pyni ha ki 300 tylli ki shnong ba don ha India bad ki trai jong ki rynsan bapher bapher ki sngew ba ka Jawan kan sa khring biang ia ki nongpeitkai ban kwah wan peit ia katei ka phlim sha ki rynsan.
La ong ba ki phlim u SRK ki la pynheh mynsiem ia ki trai jong ki rynsan bapher bapher ha kaba naduh ka Pathaan kane ka phlim ka la iaid bad la pyni haduh bun bun sngi ha ki rynsan bad ki nongpeitkai kila wan ban peitkai haduh arsien laisien.
Ym tang ha India ba ki nongpeitkai ki la shah khring ha ka Jawan hynrei wat sha kiwei de ki bynta jong ki ri ka pyrthei. Wat naduh shwa ban pyni ia kane ka phlim ka la don ka Advance Booking ha kaba iadei bad ka Jawan bad kane ka pyni bad pynpaw ba bun ki angnud ban peitkai ia kane ka phlim u SRK.
Kiwei kiwei ki ban shim bynta lang ha kane ka phlim kin kynthup ruh u Vijay Sethupathi bad ka Deepika Padukone.
