Shillong, Nailur 04
Ka Khasi Students’ Union (KSU), Mawlai Circle bad ka Central Executive Council jong ka Hynñiewtrep Youth Council (HYC) ka la pynrem jur ïa ka jingleh jong uwei u pulit, uba la kawang da u bom pynsat khmat hapoh kawei ka dukan sha kaba don ha jaka ïeng kali mar pyrshah bad ka SBI Main Branch.
Ha ka kyrwoh khubor ba la pyllait da u President ka KSU Mawlai u samla Biangbor Paliar u la ong, ha ka jingmih ka jingïakynad hapdeng ki dkhot kawei ka seng bad ki pulit hapoh ki thaiñ Khyndailad, la sakhi ïa ka jingpynibor jong ki pulit bad ha kane ka jingpyni bor, ka la don ka jingleh palat jong ki bor pulit ha kaba ki la thombor khlem kheiñ snep shuh ïa ki kynthei briew kiba die dukan hapoh ka jaka pynïeng kali jong ka MUDA ha pyrshah ka SBI ophis hajan Khyndailad.
U samla Biangbor u la ong, kane ka jingthombor ki pulit da kaba kawang ïa u bom pynsat khmat hapoh ka dukan die sha wat hapdeng ba kitei ki longkmie ki la khang khyrdep ïa ka dukan ka jong ki, kaba la paw lyngba ki kor ring dur ha kaba uwei u pulit phong jaiñ ïong u la kawang da u bom pynsat khmat, ka dei ka jingthmu ban pynmynsaw ïa ki 2 ngut ki kynthei briew kiba dei napoh ka shnong Mawlai Mawtawar, Umjalimut.
Ka KSU ka la ong ba kane ka jingleh utei u pulit ka dei ym tang ka jingleh kput lane leh rhah hynrei ka dei ka jingthmu wat ban shim ïa ka jingim ka jong kitei ki kynthei ki bym don bynta eiei ha ka jingkulmar kaba mih ha ki thaiñ Khyndailad ha ka sngi Nyngkong.
Ka seng ka pynrem jur ïa kane ka jingthombor ki pulit ki bym shym la don ka mynsiem jingisynei shuh wat ïa ki kynthei, bad ka dawa ba ki bor bahalor ki dei ban pynshitom mardor ïa ki pulit kiba donkti ha katei ka jingthombor.
Shuh shuh ka seng ka i kyndit ïa ka jingleh khlaiñ bor ki pulit ïa la ki doh ki snam hapoh sor Shillong hynrei katba ki pynrit bad pyndem tdong pat ha ki thaiñ khappud.
Ha kawei pat ka kyrwoh ba la pyllait da u General Secretary ka Central Executive Council ka HYC u Bah Roykupar Synrem, la ong ba ka seng ka pynrem jur ïa ka jingleh jong uwei u pulit uba phong jaiñ ïong uba kah dur ïalade, uba la bret da u Stun Grenade ha kawei na ki dukan jong ka longkmie Khasi.
U Bah Synrem u la ong, kane ka jingleh jong une u pulit i kumba u don jingthmu ban shim ïa ka jingim jong kiba don hapoh jong kane ka dukan kiba kynthup ïa ki trai dukan bad ïa ki nongwan bam. “Shu donbok ba ha kane ka dukan kim shym lah pyndonkam ïa ki tyndong shet (LPG Cylinder) hynrei te ka la jia kaei kaei kaba sngewsih wat ban poi sha ka jingïap ruh ïa kiba don hapoh kane ka dukan,” u la ong.
“Na ka liang ka seng, ngi dawa ba dei ban pynshitom ïa une u pulit bad ïa ki ophisar ki bym shym la lah ban tehlakam ïa ki pulit lajong. Ha ka jingshisha haba pyndonkam ïa ki tear gas dei ban da antad tang ban pynpra ïa ki paidbah ym ban leit kawang sha ki dukan sha jong ki riewshimet. Ka Sorkar ka dei ban pynlong da ka jingtohkit kaba laitluid la utei u pulit u bret ïa utei u bom da lade hi lane la don ki ophisar kiba aibor ïa u ba un leh ïa katei ka kam beaiñ,” la ong u Bah Synrem.
“Ngi dawa ruh ba ki bor pulit bad ki bor synshar district ki dei ban pynshai naei ki ïoh ïa ka bor ba kin leit kawang ïa kum kine ki tiar pynbthei hapoh ki dukan jong ki riew paidbah ki bym don bynta eiei bad ka jingjia ïa kulmar. Ka Sorkar ka dei ban leit siew bai lutksan mardor ïa ki trai dukan bad kumjuh ruh ka dei ban ai bai dawai ïa kiba mynsaw ha katei ka dukan,” la pynkut ka kyrwoh na ka HYC.
