Shillong, Nailur 04
Ka Khasi Students’ Union (KSU) ka la dawa ba dei ban pynduh pyndam noh mardor ïa ka bhah pule doktor (MBBS) jong palat 10 ngut ki samla kiba la shah jied na ka Open Category ka State Quota (bhah ka Jylla) bad kumjuh ruh ban peit bad bishar bniah biang ïa ki kot ki sla, lym kumta, ka sorkar kan hap ban mad ïa ki jingtynjuh kiba tyngeh.
Ka jingdawa jong ka KSU ban pyndam noh ïa ka bhah jong kitei ki samla ka dei namar ba kim shym la lah ban pynbiang ne aiti ïa ka Permanent Residential Certificate (PRC) bad don ruh ki bym biang ka syrnod sngi kha.
Ha ka shithi ba la aiti sha u Myntri Rangbah ka Jylla, Conrad K Sangma bad sha ka Myntri ka tnat ka Koit ka Khiah ka Kong Ampareen Lyngdoh, u President ka KSU samla Lambokstar Marngar u la ong ba 10 ngut ki samla pule kim shym la aiti ïa ki kot ki sla ba donkam katkum ka jingbthah ba la pynmih da ka DHS.
Haba kren sha ki lad pathai khubor, u la ong ba ka jingbym don ïa ka PRC kum kawei na ki kot ki sla ba donkam ka la khring sha ka jingpynduh noh ïa kine ki samla ban ïoh ïa ka bhah haba bynrap ba ki Birth Certificate ne syrnod sngi kha ba la aiti ruh ki dei ki bym don ïa ki Serial Number bad ka hukum ka ïingkashari ka dei ba hap ban tohkit bniah ba kumno la ai ïa kine ki kot ki sla da ki bor ba dei khmih.
“Ka KSU ka dawa ban pynduh noh mardor ïa palat 10 ngut ki samla ban ïoh ïa ka bhah pule MBBS na ka thup Open Category bad ha ka jaka jong ki, ki samla kiba dei hok, ki dei ban shah kynthup noh. Ka Seng ka kyrmen ba ka Sorkar kan shim/leh ïa kaba donkam ban pynthikna ba ki samla pule ba dei hok jong ka Jylla kin ym shah pynduh ïa la ka hok bad ki samla ki bym tip ki dei kiba naei, ki dei ban shah pynsaja katkum ka aiñ,” la ong ka KSU.
Ka shithi ka pynpaw ba u Mehbub Hassan u khlem aiti ïa ka PRC, hynrei u la aiti pynban da ka Provisional PRC kaba la ai sha u ha ka 7 tarik Jylliew 2023 ha Dadenggre bad kaba treikam tang 12 bnai. Ïa une u samla la kha ha u snem 2001 bad ka syrnod sngikha (Birth Certificate) ka dei kaba la ai ha u 2019, ka bym don satia ïa u serial number bad ka hukum ka ïingkashari ban pynthikna ïa ka.
“U Monimul Ekram Mandal u khlem aiti ïa ka syrnod sngikha (Birth Certificate) hynrei u la aiti da ka PPRC kaba im tang 3 bnai ym da da ka PRC,” la ong ka seng bad bynrap kumjuh ruh u Ayush Kumar u la aiti tang ka syrnod sngikha ba na Bihar khlem ka hukum ka ïingkashari, ki kot ki sla ka CBSE na Rajasthan bad ka PRC na East Jaintia Hills.
U Md Mahmadul Islam u la aiti tang ka syrnod sngikha ba la ai ha u 2022 watla ïa une u briew la kha ha u snem ba bud kata ha u 2003. Ym shym la aiti ïa ka PRC hynrei da ka PPRC na West Garo Hills kaba treikam tang 12 bnai.
Kumjuh ruh u Atifa Zaman um shym la aiti ïa ka Birth Certificate ne PRC hynrei la aiti da ka PPRC na West Garo Hills kaba treikam tang 12 bnai. U Chiranjit Kumar Paul u la aiti ïa ka syrnod sngikha ba la ai sha u ha u 2008 wat la ïa une u briew la kha ha u 2005. Hynrei hangne ruh ym shym la don ka hukum ka ïingkashari. Une ruh u khlem aiti ïa ka PRC hynrei da ka PPRC kaba treikam tang 12 bnai.
Ka Deeya Choudhary ruh ka la aiti ïa ka PRC hynrei khlem ai ïa ka syrnod sngikha, kumta donkam ban hap pynthikna ïa ka jaka sah bad ka sngi kha jong kane ka samla. U Angoor Zaman Hoque ruh u la aiti ïa ka Birth Certificate bym don ïa ka hukum ka ïingkashari bad ka serial number bad nalor kane, um don PRC hynrei tang ka PPRC na West Garo Hills kaba treikam tang 12 bnai.
U Abdul Kalam Golam Mahdi Alom: Ka syrnod sngikha kaba la ai ha u snem 2014 hadien 12 snem ba kha ïa u bad ka bym don satia ïa ka hukum ka ïingkashari bad ka serial number bad nalor kane, um don PRC hynrei da ka PPRC bala aiti ha ka 16 tarik Jymmang, 2023 kaba treikam tang 3 bnai.
U Habibur Rehman: U samla uba mih kyrteng ha ka Waiting List jong ka Open Category u khlem aiti ïa ka PRC hynrei u la ai da ka PPRC kaba treikam tang 12 bnai bad ym shym la batai ruh ïa ka jaka ba kha ïa u.
U samla Lambok u la ong ba kum ka seng hadien ba ka la sngew artatien halor ka thup kyrteng kaba mih, ki la wad jingtip lyngba ka RTI bad la ïoh lut ïa kine ki jingtip.
“Ngi sngew ba ka sorkar ka dei ban shimkhia halor kane, namar ngin nym lah ban pdiang ba ki briew na Bihar ne na kiwei ki jaka, kin wan shim bhah napoh ka jylla jong ngi. Ka paw ba kane baroh ka dei ka jingleh lymmuh na ka liang ki briew ka tnat ba dei peit,” la ong u Samla Lambok.
