Shillong, Nailur 05
U ksiang ka Hynñiewtrep National Liberation Council (HNLC) bad President ka Hynñiewtrep National Youth Front (HNYF), Bah Sadon K. Blah ha ka Sngi Ba-ar u la ong ba yn sa shong jingïalang mynta ka taïew halor ka jingkyrpad ka Sorkar Jylla ïa ki nongïalam ba hakhmat ka seng (HNLC) ban ïadon bynta lang ha ka jingïakren ïasuk.
“Ïa kata ngin sa shong jingïalang ban pynbeit mynta ka taïew,” la ong u Bah Blah haba jubab halor ka jingkyrpad ka Sorkar Jylla ïa ki nongïalam ba hakhmat ka seng ban ïadon bynta lang ha ka jingïakren ïasuk.
U la ong ruh ba ynda la dep shong jingïalang yn sa lah ban shim ïa ka rai la ki nongïalam ba hakhmat ka seng kin wan ne em ha ryngkat ki nongrim sha katei ka jingkyrpad ka Sorkar Jylla.
Wat la ka jingïakren ïasuk hapdeng ka HNLC bad ka Sorkar Jylla kynthup ka Sorkar Pdeng ka dang ïai bteng, ka seng ka la ïohi ïa ka shithi kaba la phah sha u General Secretary, uba dei ruh u Publicity Secretary ka seng, Bah Saiñkupar Nongtraw, ha kaba ka ïingkashari ka la khot hajir ïa u.
Kane, ha kawei ka liang, ka la pynlong ïa ka seng ban byrngem ha ka ban pynsangeh noh ka jingïakren ïasuk bad lada ka Sorkar ka kwah ba ka jingïakren ïasuk kan bteng, kata ka dei ban weng noh ïa baroh ki mukotduma pyrshah ïa ka HNLC bad ki dkhot jong ka.
Kum ban shu kdew hangne, u Symbud Myntri Rangbah ka Jylla, Bah Prestone Tynsong ha ka Lah Sngi U Blei u la ong ba ka jingshah khot hajir jong ki nongïalam ka HNLC kam dei ba la leh da ka Sorkar Jylla hynrei ka dei shi bynta jong ka jingtreikam ka ïingkashari bad kam don bynta eiei bad ka Sorkar.
Na ka liang u Bah Tynsong u la kyrpad ruh ïa ki nongïalam ba hakhmat ka HNLC ban shim khia ïa ka jingïakren ïasuk bad ba kim dei ban don kano-kano ka jingkhuslai jingmut ha kaba ïadei bad ka shithi ba la pynmih da ka ïingkashari namarba kane ka dei shibynta ka jingtreikam jong ka ïingkashari.
Ha kajuh ka por, u la ong ba lada ka HNLC ka kwah shisha ban poi sha ka jingïakren ïasuk, na ka liang ka Sorkar Pdeng bad Sorkar Jylla ki long kiba shim khia ban poi sha kata ka thong bad kum ka seng ka dei ban ïatreilang bad ka Sorkar lyngba u ksiang uba ka seng ka la thung bad lyngba u ksiang ba la thung na ka liang ka Sorkar.
Ha kaba ïadei bad ka jingdawa jong ka HNLC ban map ïa baroh ki mukotduma pyrshah ïa ka seng bad ïa ki dkhot jong ka, u Symbud Myntri Rangbah u la ong ba ka Sorkar kan hap ban ïakren bad ki nongïalam kiba hakhmat jong ka seng namar ba ka Sorkar Jylla bad ka Sorkar Pdeng ki da angnud shisha ban poi sha ka jingïakren ïasuk bad ka HNLC.
Shuh shuh u la kyrpad ïa ki nongïalam ba hakhmat jong ka HNLC ba kin wan shakhmat kata ïa u General Secretary ka seng, u Bah Saiñkupar Nongtraw bad u Chairman, u Bah Bobby Marweiñ ba ki dei ban don bynta lang ha katei ka jingïakren ïasuk.
