Shillong, Nailur 05
Na ka por sha ka por, ka Sorkar ka ju pynbun ïa ki jaka ap kali harud surok ban pynsuk ïa ki paidbah nongleit nongwan kiba shait shong da ki kali paidbah kum ki bos bad taksi.
Ha kine ki jaka ap kali ba la shna khnang, ki kali kamai naduh ki bos, taksi bad kiwei ki ju pynhiar bad kyntiew briew namar ka dei ruh ka jaka ban sangeh namar ki don beit ki nongap kali.
Hynrei ha kawei na ki jaka ap kali jong ki paidbah kaba don ha thaiñ IGP, ki pulit ki la shah pynban ïa ki kali jong ki ’riewshimet ban pynlong kum ka jaka ïeng kali.
La sakhi ba man ka sngi, ki kali jong ki ’riewshimet ki ïeng hakhmat jong kane ka jaka ap bos bad jaka ap taksi ki paidbah.
Kane ka la ktah ym tang ïa kiba ap kali kamai, hynrei wat ki bos bad ki taksi ruh ki shem jingeh ban ïeng hangne ban kyntiew ne pynhiar briew na kali.
Kane ka jaka ap kali ki paidbah ha IGP, ka dei ruh kaba ki pulit pynïaid kali ki ïohi pylleiñ-pylleiñ ïa ki ’riewshimet kiba pynlong kum ka jaka ïeng kali (parking) namar ha mar pyrshah kane ka jaka ap kali, ka don ka jaka ïeng jong ki pulit pynïaid kali (traffic police) hangtei.
Kane ka jaka ka dei ruh kaba ki kali ki ïaid khlem sangeh namar ka dei kaba don bun tylli ki lad kiba ïakynduh lang ki kali ha kane ka jaka ba don ka jaka ap kali bad ka jaka ïeng ki pulit pynïaid kali.
