Shillong, Nailur 06
U Symbud Myntri Rangbah ka jylla uba khmih ïa ka PWD (R&B), u Bah Prestone Tynsong u la ïakren bad ki ophisar ka tnat Road Transport and Highways ka Sorkar Pdeng ha Delhi ha kaba la shim ïa ka rai ban pynsted noh ïa ka kam bad ban maramot noh mardor ïa ka surok kaba la sniew na Shillong sha Dawki ban pynsuk ïa ka leit ka wan jong ki paidbah.
Ha kane ka jingïakynduh, ki ophisar ka Sorkar Pdeng ki kynthup ïa u Additional Secretary ka Ministry of Road Transport and Highway (MoRTH) uba long ruh ha kajuh ka por u Managing Director (MD) ka NHIDCL u Mahmood Ahmed, u Chairman ka National Highway Authority of India (NHAI), u Santosh Kumar Yadav uba long ruh u Joint Secretary ka MoRTH bad u Anurag Jain uba long u Secretary ka MoRTH. La synran lang ruh da u Chief Engineer na ka Jylla uba khmih ïa ka National Highway, u CN Sangma bad u Superintending Engineer u Rilang Lyngdoh.
Haba ïadei bad ka surokbah (National Highway-6) na Jowai sha Lumshnong shaduh Ratacherra, la shim ïa ka rai ban sdang noh ïa ka jingmaramot ïa katei ka surok la kumno-kumno naduh ka taïew ban wan bad naduh u Naiwieng mynta u snem, yn buh syndon da ka kompani ka ban peit ban khmih ïa katei ka surokbah baroh kawei.
Ka surok na Shillong sha Dawki ka dei kaba la sniew bha khamtam hadien ba la sdang pyntrei ïa ka jingpynheh ïa kane ka surok.
