Shillong, Nailur 06
Ka NEHUSU ha ka Sngi Balang ka la sangeh ban ïashim bynta ha ki klas bad pynlong ruh ïa ka jingïaid paidbah na Central Library sha Administration Block kum ka dak ka jingpyrshah ïa ka rukom ai ‘mark’ ka bym hok bad kaba la rim – kaba ktah shi kat dei ïa ka lawei ki samla pule.
Ki dkhot ka seng ha ryngkat ki samla pule ki la pynlong ïa ka jingshong kyllaiñ mungor habar shlem treikam u VC ka NEHU ban dawa pyntreikam ïa ka ‘Relative Grading System’ (RGS) ka ban kyntiew bad pynbha ïa ka jingai kyrdan ïa ki samla pule.
Haba kdew ba kim mynjur ba ka don ka jingbym biang ha ki sap ki phong ne ka jinglah hapdeng ki samla pule ban ïoh ïa ki ‘mark’ kiba heh, ka NEHUSU ka ngeit skhem ba ka jingai kyrdan ba rit ha NEHU ka dei namar jong ka rukom ai ‘mark’ kaba ka bud bad kane kam don jingïadei eiei bad ka jingstad ne jingshemphang jong ki samla pule.
Na ka liang ka seng ha kane ka sngi ka la aiti ruh ïa ka dorkhas sha u VC, Prof. Prabha Shankar Shukla halor katei ka bynta.
Ha ka dorkhas, ka seng ka la kynnoh ba ka rukom ai ‘mark’ ne ka jingai kyrdan ba mynta hapoh ka skulbah ka buh jingeh shi kat dei ïa ki samla pule haba nujor bad kiwei-kiwei ki skulbah.
Ka seng ka la ong ruh ba kane ka rukom ai kyrdan ka ktah ïa ka jingpule ki samla pule bad ka lawei jong ki, ha kawei ka liang kaba tyngkhuh ïa ki nongrim ba la seng ïa ka skulbah kumba la shon ha ka NEHU Act, 1973, kaba thmu ban pynbha ïa ki jingbuh kyndon ha ka liang ka imlang-sahlang, ïoh ka kot, bad ka jingnang-jingstad jong ki jaka lum hapoh ka thaiñ.
Halor kitei, ka NEHUSU ka la buh ïa ki jingdawa ba kynthup ïa ka jingpyntreikam ba mardor ïa ka RGS. Ha kajuh ka por, ka seng ka la dawa ruh ban pynsangeh ïa ka risol ‘Second-Semester’ tad ynda la pyntreikam ïa ka RGS kumjuh ban dawa khmih bniah ïa ki risol jong ki ‘Semester’ barim na bynta kiba pule (ba mynta) ka ban long ryntih bad ka rukom ai kyrdan bathymmai.
Shuh shuh ka seng ka la ai nuksa halor ki kyndon ba kynthup ïa kito na ka University Grants Commission (UGC) bad ka All India Council for Technical Education (AICTE), kaba ai jingmut ban kdup ïa ka RGS ban pyntikna ïa ka jingbym shah liang bad ka jingïaid beit ha rukom kheiñ jingkheiñ na bynta ki samla pule.
