Shillong, Nailur 06
U Working President ka Khun Hynñiewtrep National Awakening Movement (KHNAM) u Bah Thomas Passah u la ther ïa ka Sorkar Jylla bad ka tnat pulit halor ka jingpyndonkam ïa ka kyndon 171 IPC ban khot hajir ïa ki dkhot ka Hynñiewtrep Integrated Territorial Organisation (HITO) namar ka jingpyndonkam ïa ka riam jong ki bor pahara kiba dei ki briew Sorkar.
U Bah Thomas u la pyni nuksa ïa kawei ka jingjia ha ka 2 tarik Nailur, 2023 ha kaba uwei u briew uba kyrteng u Neeraj Vikram Vishwakarma u la shahkem ha ki shipai namar ba u la phong ïa ki jaiñ shipai, deng ïa ki ‘badge’ shipai bad u pynithuh ïalade kum u shipai, bad ïa kum kine ki jingleh, kan treikam ka kyndon 171 IPC.
“Hynrei ka HITO ka khlem phong ïa ki jaiñ ïong da ka jingthmu ban thok lane ïalam bakla ïa ki paidbah lane ïa ka Sorkar, bad katkum kaba ngi la ïohi ha social media, la ar snem mynta ngim tharai ba ka HITO ka phong ïa ki jaiñ kiba ïasyrïem bad ki jaiñ ba phong ki shakri Sorkar haba ngi peit ïa ki badge lane kino-kino ki dak jong ka sopti ba ka HITO ka phong. Namar kata, ngi ïohi ba ka Sorkar ka la pyndonkam bakla ïa ka 171 IPC tang ban pynkbum ïa kiba kren namar ki paid Hynñiewtrep, bad kadei ka jingleh donbor jong ka sorkar,” la kynthoh u Bah Thomas.
U la ong ba ka Sorkar kam pat lap lane shem bad khlem pat don kano-kano ka jingujor ba ka HITO ka la leh ïa ka kam beaiñ. Namar kata, ka jingpynngat ha ka 34 IPC ruh ka long kaba bakla.
Haba kynthoh halor ka jingjia hapdeng ki pulit bad ki dkhot ka HITO kaba la jia ha ka 4 tarik Nailur, 2023, ha kaba ki pulit ki la pyndonkam ruh da ki lathi bad lyer pynsat khmat (tear gas), u Bah Thomas u la ong ba ka Sorkar Jylla hi ka la pynkheiñ ïa ka Meghalaya Police Act, 2010 da ka jingbym thaw jong ka ïa ka Police Accountability Commission.
U Bah Thomas u la ong ka jingbym thaw ïa ka Commission ka plie lad ïa ki bor pulit ban pyndonkam bakla ïa ka bor.
Halor ka kyndon (section) 34 IPC, u Bah Thomas u la buh jingkylli, “ka kam runar kaba kumno ka HITO ka la leh ban hap ngat ha katei ka kyndon, bad ka jingpynngat ha kane ka kyndon ka dei ka bym shong nongrim.
Halor ka Section 105 jong ka Meghalaya Police Act, 2010 kaba kren shai ba ki paidbah kim lah ban phong ïa ki uniform pulit khlem jingbit, u Bah Thomas u la ong ba ki jaiñ ba phong ki dkhot ka HITO kim don jingïadei eiei bad ki uniform pulit.
Haba kyntu ïa ka Sorkar ban thung ïa ki riewtip aiñ, u la pynpaw ka jingsngewkhia namar ha katei ka por ba mih ka jingïakynad hapdeng ki pulit bad ki dkhot ka HITO, ka dei ruh ka por wai skul ki khynnah nalor ki paidbah kiba ïaid ba ïeng ha surok ha kaba ki pulit ki la kawang pynban da ki tear gas.
U Bah Thomas u la pynrem ruh ïa ka jingkren sih ki pulit da kaba ong ba ka long kaba khlem akor bad ka pynjah burom ïa ka tnat pulit bad ka Jylla hi baroh kawei.
