Nongpoh, Nailur 06
Ka la long ka burom kaba khraw ïa ka jylla Meghalaya hadien ba uwei na ki nonghikai na Ri Bhoi District u la shah pynkup burom lem bad kiwei ki nonghikai na kylleng ka Ri ha ka thup jong ka National Teachers’ Award 2023 kaba la pynlong ha Vigyan Bhavan jong ka nongbah New Delhi ha ka Sngi Ba-ar kaba dei ruh ka sngi rakhe kyrpang jong ki nonghikai lane kata ka Teacher’s Day.
Ha kane ka jingïalang pynkup burom ïa ki nonghikai, kaba dei ruh ka sngi kha jong u Dr. Sarvepalli Radhakrishnan, la pynlong da ka Department of School Education & Literacy, Ministry of Education, la wan ban ïa don bynta da ka President jong ka Ri, ka Droupadi Murmu ban sam ïa ki khusnam sha ki nonghikai kiba kynthup ïa 50 ngut ha ka kyrdan School Teachers, 13 ngut ha ka kyrdan Higher Education bad 12 ngut pat na ka Ministry of Skill Development & Entrepreneurship.
Utei u nonghikai na Ri Bhoi District, uba la shah jied ban ïoh ïa katei ka khusnam u dei u Madhav Singh, uba hikai ïa ka sobjek Science ha ka skul Alpha Higher Secondary School, Nongpoh. Ha katei ka jingshah pynkup burom ha ka Droupadi Murmu, utei u nonghikai u la ïoh ïa ka syrnod, ka song pisa kaba T.50,000 lem bad ka takma rupa. Ha katei ka sngi, ki nonghikai baroh 75 ngut kiba la shah pynkup burom, ki la ïoh ruh ïa ka lad ban ïakren bad u Myntri Rangbah duh ka Ri, u Narendra Modi.
U Madhav Singh haba ïoh ban ïakren, u la pynpaw ïa ka jingsngewkmen kaba khraw ban ïoh ïa katei ka khusnam kaba long kum jingai mynsiem ïa u kum u nonghikai ba un dang lah shuh shuh ban ai ïa ka jingshakri kaba paka tam sha ki khynnah pule ha baroh ki liang khnang ba kin nang kiew shaphrang ha ka jingim ka jong ki. U la pynpaw ruh ïa ka jingsngewnguh sha ka tnat pule puthi jong ka District, ka Jylla bad ka Ri hi baroh kawei kiba la jied bad ibit ïa u ban ïoh ïa katei ka khusnam.
Shuh shuh u la pynpaw ruh ïa ka burom kaba kyrpang sha ki bor pynïaid skul, ki nongkyrshan kiba ju ai mynsiem na ka por sha ka por kaba la pynlong ïa u ban don ïa ka mynsiem ïai minot ban ai ïa ka jingshakri kaba paka tam na ka bynta ban kyntiew ïa ka jingnang jingstad bad ka lawei jong ki khynnah pule.
