Shillong, Nailur 06
Ki nongïalam shnong ka Thangskai ha ryngkat ki nongïalam ka Jaiñtia Students’ Union (JSU) Khliehriat Circle ki la leit ban dawa na u Deputy Commissioner (DC) ka East Jaiñtia Hills ban pyndam noh ïa ka kyrteng u Ayush Kumar na ka thup pule MBBS.
Ha kane ka jingleit ïakynduh ïa u DC ha ka Sngi Balang, ki Waheh Shnong ka Thangskai ba la synran lang da ki nongïalam ka JSU Khliehriat Circle ka la ai syndon da ka jingthoh sha u DC ban pyndam ïa ka Permanent Residential Certificate (PRC) kaba une u bar jylla u Ayush Kumar lem bad u kpa u Sunil Kumar namar ki la pyndonkam thok ban aplai ïa ka bhah jong ka jylla ban pule MBBS.
Ka shnong ka la pynshai ba ha u snem 2021 la ai syrnot nongshong shnong kaba shipor kata hynriew bnai namar u kpa jong une u khynnah u dei uba trei ha Dalmia Cement, uba la pan ïa ka Temporary Residential Certificate na ka shnong ban phah sha ka skul ha Orissa hynrei pynban kine ki bar jylla ki la pyndonkam thok ban aplai ïa ka PRC na ophis u DC ka East Jaiñtia bad ki la leh thok bad shukor ban ïoh lad syndon ban ïoh ïa ka bhah ka jylla na ka sorkar ban pule MBBS.
Kumta na ka liang ka shnong ka la ai da ka jingthoh sha u DC ban dawa pynduh pyndam syndon ïa ka PRC bad ïa ka bhah pule MBBS namar une u khynnah lem bad u kpa ki la leh thok bad shukor ban myntoi ïalade.
Namar kata, na ka liang ka JSU ka la maham ïa kiwei ruh ki bar jylla bad ïa ki nongïalam shnong ba ym dei ban shim kabu lane ban ai NOC lane kino-kino ki syrnot sha ki bar jylla. Nalor nangta, ka seng ka dawa syndon na ka Myntri ka sorkar jylla ban pynduh ïa ka bhah u Ayush Kumar na ka thup pule doktor MBBS bad dei ban ai sha ki trai ri trai muluk.
