Nongpoh, Nailur 07
Ka shlem treikam District Medical and Health Officer (DMHO) Ri Bhoi District ha ka jingpyllait khubor, ka la pyntip sha baroh ki kmie ki kpa jong ki khyllung rit kiba hapoh 5 snem ka rta, ba la sdang ïa ka Intensified Mission Indradhanush (IMI) 5.0 ban ai tika sha baroh ki khyllung rit kiba hapoh 5 snem ka rta bad kumjuh ruh ïa ki kmie kiba armet kiba khlem pat ïoh tika ha ki snem ba la dep ba kin shim noh ha kane ka kynti kaba mynta.
Kumba ïa kane ka IMI 5.0 la pynlong ha baroh kawei ka ri India, ka jingthmu ba kongsan ka long ban lait na ka jingpang Measles bad Rubella. Ka shlem treikam DMHO ka la pyntip ruh ba lyngba ka jingai tika, kan pynlong ïa ki khyllung rit ba kin lait na ki jingpang bapher bapher kum ka Diptheria, Pertussis, Tetanus, Polio, Measles, Rubella, Hepatitis B, Pneumococcal Pneumonia, Meningitis, Pneumonia na u Haemophilus Influenza Type-B, Rotavirus bad Japanese Encephalitis.
Kane ka shlem treikam ka la pyntip ruh ba kane ka jingai tika ka long kaba shngaiñ bad ka bym don jingma eiei. Kumta ka la kyntu ïa ki kmie ki kpa ba kin wan shakhmat ban ai tika ïa la ki khun rit da kaba pyntip ruh ba lada ki khunlung ba hapoh 2 snem ka rta ki bym pat ïoh tika eiei mynshuwa hynrei lada ki wan ai noh mynta, kin ïoh jingïada na ki hynñiew jait ki jingpang kiba la tip kum ka Diptheria, Pertussis, Tetanus, Polio, Measles, Rubella bad Japanese Encephalitis.
Shuh shuh ka shlem treikam DMHO ka la pyntip ruh ba ïa kane ka prokram IMI 5.0 la sdang shaid-shaid naduh u bnai Nailar bad kan kut haduh u bnai Risaw 2023. Ïa kane ka jingai tika la phiah ha ki lai bynta; ka bynta ba nyngkong la pynlong naduh ka 7 tarik haduh ka 12 tarik jong u bnai Nailur 2023, ka bynta ba ar la pynlong naduh ka 11 tarik haduh ka 16 tarik u bnai Nailur 2023 bad ka bynta ba lai yn sdang naduh ka 9 tarik haduh ka 4 tarik u bnai Risaw 2023.
Kumta ïa ka jingtip kaba kham bniah shaphang ka jaka bad ka por ban ai tika, ki kmie ki kpa ki lah ban ïakynduh ïa ki ASHA, ANM bad ha ki jaka ai jingsumar jong ka sorkar kiba don hajan.
