Shillong, Nailur 07
Ka Khun Hynñiewtrep National Awakening Movement (KHNAM) ka la pynpaw ïa ka jinglyngngoh kaba khraw hadien ba la lap ba ka kompani Shillong Club Limited kaba la pynïaid da ki bar jylla kam don ïa ka laisen khaïi na ka Khasi Hills Autonomous District Council (KHADC) katkum ka Trading by Non-Tribal Regulation, 1954.
Ha kaba ïadei bad kane ka bynta, na ka liang u Working President ka KHNAM, Bah Thomas Passah, u la ong ba ïa ka Gulf Course la ai wai sha ki bar jylla naduh u snem 1924. Kaba sngewlyngngoh pat ka long ba ïa katei ka jaka la ai wai khlem da buh por. Kane ka jingleh ka la long kumba katei ka jaka la dei trai da ki bar jylla bad pynïaid da ki bar jylla haduh mynta.
“Mynta ngi ïohi ba ka la don ka jinglum ïa ka bai rung na ki Khasi kiba wan kai ha kane ka jaka kaba la poi da ki lak ha ka shi taïew,” la ong u Bah Thomas.
U Bah Thomas u la ong ba na ka liang ka seng kam sngewïahap ïa kane ka jingleh ba u bar jylla un pynïaid ïa ka khyndew ka shyiap u Khasi bad ban shim pisa kylla na ki Khasi hi.
Shuh shuh u Bah Thomas u la kyntu ïa ki lai tylli ki Dorbar Shnong kiba don ha katei ka thaiñ ba ki dei ban shim khia halor kane ka kam bad ban khanglad ïa ka jingleh trai ki bar jylla ïa kane ka Gulf Course. U la dawa ruh ba ka KHADC ka dei ban shim khia bad leh eiei ïa kum kine ki briew kiba pynkheiñ ïa ki aiñ jong ka KHADC.
