Shillong, Nailur 07
Ha ki 8 bnai ba la dep, ki pulit ka East Jaiñtia Hills ki la ïoh ban kurup palat 6 kilo u drok Heroin nalor kiwei pat ki jingdih pynbuaid bad kiba la shah kem ha kine ki jingïoh kurup ki la kot sha ka 78 ngut.
Haba ai ïa kine ki jingkheiñ jingdiah, u SP ka East Jaiñtia Hills, u Jagpal Singh Dhanoa, u la ong ba naduh ba sdang snem kat haduh mynta, ki pulit ki la pynrung 37 tylli ki jingujor hapoh ki kyndon ka Narcotic Drugs and Psychotropic Substances Act, 1985 ha kaba ïadei bad ka jingïoh kurup drok bad kiwei ki jingdih pynbuaid.
U la ïathuh ba ki drok ba la ïoh kurup ki kynthup ïa 6.1953 Kilo u Heroin, 1148.98 Kilo u kynja (Ganja), 10.16 Kilo u Crystal Meth, 10,000 tylli ki dawai kuli Yaba, bad 20,000 bilor ka dawai jyrhoh Phensedyl.
Da kheiñ da ka pisa, ka dor jong kitei ki drok ka la kot sha ki phew klur tyngka khamtam u Heroin. Haba kheiñ malu-mala katkum ka dor ïew, utei u 6.1953 Kilo u Heroin un shongdor ym duna ïa ka T. 40 klur eiei.
Ha kine ki 8 bnai tam, u Heroin ba bun tam ba la ïoh kurup u la kot sha ka 1.40 Kilo na uwei u briew ba la tip kyrteng kum u Albert Lalropiang.
Dang ha kine ki khyndiat sngi, ki pulit ka East Jaiñtia Hills ki la kurup 10.16 Kilo u drok Crystal Meth na uwei u briew uba la tip kyrteng kum u Lalhmunsanga uba la wan na Mizoram. Ka jingshongdor jong une u drok, katkum ka jingpynbna jong u Myntri Rangbah, Conrad K Sangma, ka long haduh T. 15 klur.
Ha kitei ki 37 tylli ki jingjia ïoh kurup drok, ki pulit ki la kem ïa 78 ngut ki briew kiba donkti. Hynrei ka don kawei ka jingjia ha kaba ki pulit ki la kurup 111.183 Kilo u Kynja (Ganja), hynrei ym shym la ïoh kem ïano-ïano na ka daw ba ki briew kiba donkti ki la phet krad na ka jaka ba la kurup.
Haba kylli la leh aïu ïa ki drok ba la kurup na ka por sha ka por, u SP u la ïathuh ba ka don ka jaka bakyrpang ha kawei na ki thanat ha East Jaiñtia Hills, bad ha kane ka jaka la buh lut ïa baroh ki drok ba la kurup hapoh ki kyndon ka NDPS Act.
Hadien kata, ynda la pyndep ïa ka mukotduma bad ka ïingbishar ka la shim ïa ki jingkheiñ halor ki drok ba la ïoh kurup ha kawei-pa-kawei ka mukotduma, ki pulit ki ju thoh sha ki bor bahalor ban pan jingbit ban thang noh ïa kito ki drok.
U SP u la ïathuh ba ha u snem ba la dep, ki pulit ki la thang ïa baroh ki drok ba la kurup napoh u pud u sam ka East Jaiñtia Hills ha kawei na ki karkhana shna dewbilat kaba don ha kane ka distrik.
Lah ban kdew ba ka East Jaiñtia Hills ka dei ka distrik kaba marjan bad ka Barak Valley jong ka Assam bad la pyndonkam ruh kum ka lynti ban leit sha Mizoram, Tripura. Ki briew kiba donkti ban khaïi drok ki ju pyndonkam bha ïa kane ka lynti na East Jaiñtia Hills ban wan die drok sha Shillong lane sha kiwei pat ki bynta jong ka Meghalaya lane wat sha Guwahati.
