Shillong, Nailur 07
U Rakkam A Sangma, uba dei u Myntri ka sorkar jylla u la ong ba ka seng jong u, ka National People’s Party (NPP) kan ïoh ïa ka jingjop ha ka ilekshon MP ka ban sa long ha u snem ban wan na Shillong Parliamentary Seat bad kumjuh ruh kan dang bat hi ïa ka Tura Parliamentary Seat.
Haba kren sha ki lad pathai khubor, u Rakkam u la ong, “Ka NPP kan ïakhun ïa ka ilekshon MP ka ban wan na baroh ar ki konstitwensi. Ngi khmih lynti ba ka NPP kan ïoh jingjop na Shillong Parliamentary ha u snem 2024. Mat dei uno-uno ruh u kyrtong, ka Shillong ka donkam ïa u briew uba tbit ban mihkhmat ïa ka NPP ha Delhi naba ki don bun ki mat kiba hap ban ïakren.”
Haba kdew halor ka jinglong jingman ha Manipur, une u Myntri u la ong, “Nga sngew tmang bha ïa ka jingduh noh ïa u PA Sangma mynta, naba ngi donkam ïa ki briew ha Parliament ban kren halor ki mat jong ka thaiñ shatei lam-mihngi, ban long u nongmihkhmat uba tbit ha Delhi, naba ka Shillong ka long kum ka nongbah jong ka thaiñ shatei lam-mihngi baroh kawei, kata shwa ka jingthaw ïa ka Assam.”
U la kyntu ruh ba lada ki paidbah nong Shillong kin lah ban phah ïa u briew uba tbit sha Parliament, kan long shisha ka jingsarong kaba khraw.
Haba kdew halor ka jingshakri jong u MP ba mynta ka Congress na Shillong u Bah Vincent H Pala, u Rakkam u la ong ba ka don ka lynti ban nang pynbha bad ba u Bah Pala u la dei ban kham lah ban leh bha shuh shuh ha Parliament na ka bynta ka bit ka biang jong ki nongshong shnong ka jylla.
“Ngan jin da la kmen lada une u MP ba mynta u la lah ban leh bha, ban kren kham bun, ban pynpaw ka jingtbit namar hadien jong ka jingkhlad noh jong u PA Sangma, la duna bha ban ïohsngew jingkren hapoh ka Parliament. Ka nongbah Shillong ka bun ki ’riew rangbah kiba tbit, kumta nga sngew ba la dei ban phah da u briew uba tbit sha Parliament ban mihkhmat ïa ngi,” la ong u Rakkam.
