Nongpoh, Nailur:
Ka District School Education Officer (DSEO) lem bad ka shlem treikam Sub Divisional School Education Officer ka Ri Bhoi District ki la pynlong ka jingrakhe ïa ka sngi kyrpang ki nonghikai lane ka Teacher’s Day ha Ri Bhoi District, hapoh ka Parish Hall Nongpoh.
Ha kane ka sngi, u MLA ka Nongpoh, Bah Mayralborn Syiem u la ïadon lang kum u kongsan ha ka jingdon ryngkat u Bah Eric Dkhar, Block Development Officer ka Umling C&RD Block, ka Kong PL Nonglait, DSEO ka Ri Bhoi, ki nongïoh khusnam, ki principal, ki nonghikai bad ki khynnah na ki skul bapher bapher lem bad kiwei kiwei.
Ha kane ka sngi, la sam ruh ïa ka khusnam kaba kyrpang sha ki lai ngut ki nonghikai kum ka jingithuh halor ka jingshakri met bad mynsiem ban kyntiew ïa ka jingnang jingstad hapoh ka District ba kynthup ïa u P Chettri, Assistant Teacher jong ka Nehru Memorial Higher Secondary School, Umsning, ka Kong B Rympei, Assistant Teacher jong ka Mynken Christian Government Upper Primary School, Bhoirymbong lem bad ka Kong JM Sun, Head Teacher jong ka Umsning Lower Primary School, Umsning. Ha kane ka sngi la pynkup burom ruh ïa ki samla kiba wan ha ka kyrdan ba hakhmat eh jong ka resol SSLC bad HSSLC 2023.
U Bah Mayralborn Syiem haba ai jingkren ha kane ka sngi, u la ai ka jingïaroh sha ka shlem treikam jong ka DSEO bad SDSEO ruh kumjuh kiba la shim khia ban pynlong ïa ka jingrakhe ban pynkup burom bad ithuh kyrpang ïa u synñiang u bynhei jong ki nonghikai ban pynsaphriang ïa ka jingnang jingstad bad ruh kiba dei ki nongtei ïa ka lawei jong ka Ri. Ha kajuh ka por u la ai khublei kyrpang ruh sha baroh ki nonghikai kiba la ïoh ïa ki khusnam ha ka District level, ka State level bad ruh ha ka National level.
Kum ka kam nonghikai kam dei kaba suk, u Bah Mayralborn u la pynpaw ba u sngewthuh eh ïa ka jingeh kaba kum ki nonghikai ki ïakynduh, hynrei u la ai mynsiem ïa ki ba kim dei ban duh jingkyrmen lane ban ieh noh shiteng por bad ba kin ïai trei shitom ban ai ïa ka jingshakri lane ka jinghikai kaba paka tam sha ki khynnah skul khnang ba ka lawei jong ki kan long kaba phyrnai.
Ha kaba ïadei bad ki khynnah skul, u Bah Mayralborn u la kyntu ba kumba ki nonghikai ki dei ki kmie ki kpa ba ar, ki khynnah skul ki dei ban nang ban burom ïa la ki nonghikai kiba pynnang pynstad ïa ki. Ha kajuh ka por u la kyntu ruh ba ki dei ban kiar lai lum lai wah na ki jingdih ba sniew, kum u duma, ka kyiad bad khamtam eh u drok uba la sdang ban kynrei bha ha kine ki sngi, hynrei ba kin phaikhmat beit thik ha ka pule puthi khnang ba kin poi sha ka thong jong ka burom lashai lashisngi.
Ha kane ka sngi la pynphuh pynphieng shuh shuh ïa ka jingrakhe lyngba ki jingrwai, ki jingshad bad ruh ki jingleh skit ba la ïashim bynta shit rhem da ki khynnah na ki skul bapher bapher ka Ri Bhoi District.
