Shillong, Nailur 08
U General Secretary ka NPP Mawsynram Block, Bah Pynshngaiñ Dohling u la pynpaw ka jingsngewkmen haba u MLA barim katei konstitwensi, Bah HM Shangpliang u la thmu ban rung noh sha ka seng NPP ryngkat ki nongkyrshan jong u na ka bynta ban pynkhlaiñ ïa ka seng ha Mawsynram konstitwensi.
Haba ïoh ban ïakren bad u Bah Dohling, u la ïathuh ba ki nongkitkam jong u Bah HM Shangpliang kiba la mih noh na ka seng BJP kin rung noh sha ka seng NPP ha ka 12 tarik mynta u bnai ha Mawsynram ha kaba ki nongkitkam ka NPP kin ïoh ban pdiang burom ïa ki.
Ha kajuh ka por u la ïathuh ba ka NPP kan sa pdiang sa ïa u Bah HM Shangpliang ha ka 13 tarik mynta u bnai ha Shillong.
“Nga don jingkyrmen ba ka jingïatreilang ki nongkyrshan u Bah HM Shangpliang bad ki nongkyrshan u Bah Alvin Sawkmie yn pynïoh biang ka jingjop ïa ka ilekshon MDC na Mawsynram konstitwensi ha u snem ban wan” u la ong.
Nalor kane, u la ïathuh ba ha kine ki sngi u Bah HM Shangpliang bad u Bah Alvin Sawkmie ki la dep ïakynduh ryngkat ki nongkitkam kiba la mih na ka seng BJP bad ki nongkitkam ka NPP ka Mawsynram Block.
Kum ban shu pynkynmaw ha ka ilekshon MLA ba dang shu dep, ka jingrem u Bah Alvin Sawkmie kum u kyrtong ka NPP bad u Bah HM Shangpliang kum u kyrtong ka BJP ka dei namar ka jingïaknieh vote kine ar ngut tang ha shnong Mawsynram bad sha ki shnong khappud kiba la ïoh mar shiphew hajar vote, katba u Bah Olan Suin uba tlot ha shnong Mawsynram bad khappud u jop ïa ka ilekshon namar u khlaiñ ha kiwei ki shnong.
Ki khubor ki ïathuh ba da ka jingïatreilang hapdeng u Bah HM Shangpliang bad u Bah Alvin Sawkmie, khlem don jingartatien ba u Bah Alvin Sawkmie un ïoh biang ïa ka jingjop ha ka ilekshon MDC ka ban long la shem snem.
Kum ban shu kdew, u Bah HM Shangpliang bad ki nongkyrshan ki la mih noh na ka seng BJP ha ka 6 tarik mynta u bnai.
