New Delhi, Nailur 08
Ki nongïalam ki Ri ka pyrthei ki la wan poi ha nongbah New Delhi ban ïashim bynta ha ka jingïalang ba ar sngi jong ka kynhun G20.
Kane ka jingïalang kan long ha ka Sngi Saitjaiñ bad Sngi U Blei, bad ka dei ka sien banyngkong eh ba ka India kan ïoh ban pynlong ïa kane ka jingïalang bah.
Na ka liang ka Sorkar India ka la phah da ki Myntri Sorkar sha kad liengsuiñ ban pdiang sngewbha ïa ki President, ki Myntri Rangbahduh bad ki Myntri jong ki Ri kiba la wan ban ïashim bynta ha kane ka jingïalang.
Napdeng ki nongïalam kiba la wan poi ki long u President ka Ri United States, u Joe Biden, u Myntri Rangbahduh ka United Kingdom, u Rishi Sunak, u President ka Argentina, u Alberto Fernandez, u President ka Brazil, u Luiz Inacio Lula Da Silva, u Myntri Rangbahduh ka Singapore, u Lee Hsien Loong, u President ka Indonesia, u Joko Widodo, u Myntri Rangbahduh ka China, u Li Qiang, u Myntri Rangbahduh ka Canada, u Justin Trudeau, u President ka Turkey, u Recep Tayyip Erdoğan, u President ka Egypt, u Abdel Fattah El-Sisi, u President ka South Korea, u Yoon Suk Yeol, u President ka South Africa, u Cyril Ramaphosa, u Secretary-General ka United Nations, u António Guterres.
Nalorkata, kiba la wan poi ki kynthup ruh ïa u Myntri ki kam bar ri ka Russia, u Sergey Lavrov, u Myntri Rangbahduh ka Mauritius, u Pravind Kumar Jugnauth, ka President ka European Union Commission, ka Ursula von der Leyen, u Myntri Rangbahduh ka Japan, u Fumio Kishida, ka Myntri Rangbahduh ka Italy, ka Giorgia Meloni bad kiwei kiwei.
Ha kane ka sngi, u Myntri Rangbahduh, u Narendra Modi, u la ïakynduh ïa u President Joe Biden ha ïing sah jong u ha 7, Lok Kalyan Marg, ha kaba ki la ïakren halor kiba bun ki mat ki jura ki ban pynkiew ïa ka jingïadei ha ka liang ka ïoh ka kot, bad ka jingïadei ki nongshong shnong.
U Modi u la pynpaw ïa ka jingkyrmen ba kane ka jingïalang kan saiñdur ïa ka lynti kaba thymmai ban wanrah ïa ka roi ka kiew ka ban pynbha ïa ki nongshong shnong jong ki Ri.
U la pyntip ba un sa pynïaid ïa ka jingïalang halor ka phang ‘One Earth’, ‘One Family’ bad ‘One Future’, ha kaba ki mat ki ban ïakren kin kynthup ïa ka jingpynkhlaiñ ïa ka roi ka kiew ka ban ai jingmyntoi ïa baroh lang. Ha kajuh ka por, u Modi un sa ïakynduh bad shong jingïalang bad ki nongïalam jong kitei ki Ri.
Ha ka Sngi Saitjaiñ, ka President ka Ri ka la khot sngewbha ïa ki nongïalam jong kitei ki Ri ban ïashim bynta lang ha ka jingïabam ja miet. Ha ka Sngi U Blei, kitei ki nongïalam kin leit ban ai burom ïa u Mahatma Gandhi ha Rajghat, bad ha kane kajuh ka sngi ban pynkut ïa ka jingïalang, ki nongïalam kin ai jingmut halor ki mat kiba ïadei bad ka lawei jong ka pyrthei. Kane ka jingïalang kan long ha ka jaka ba la tip kum ka Bharat Mandapam.
