Shillong, Nailur 10
Ka samla Stella Khongsngi ka la ïoh ban rah ïa ka nam lahduh Miss Meghalaya 2023, katba ka samla Angelina Jackson ïa ka nam Miss Teen Meghalaya 2023.
Ïa katei ka rynsan ïakob ‘thei bhabriew kaba iphuh iphieng bad shongkun ba la tip kum ka Miss Meghalaya bad ka Miss Teen Meghalaya 2023, la pynkut noh ha ka Sngi Saitjaiñ kaba la pynlong ha U Soso Tham Auditorium.
Napdeng ki 19 ngut ki nongïakhun na kylleng ka jylla, ka samla Stella Khongsngi ka la ïoh ban rah ïa ka nam lahduh Miss Meghalaya 2023 ha ryngkat ka song pisa kaba T. 1 lak.
Ka samla Stella ym tang ba ka dei ka ‘thei bhabriew, hynrei ka dei ka samla kaba don ïa ka jabieng kaba proh, bad ka dei kaba dang pule ha ka Bachelor of Science (B.Sc) ha ka sobjek Mathematic ha St. Mary’s College, Shillong.
Ka samla Stella ha kane ka jingïakob ‘thei bhabriew ka la pynshohbiej ïa ki nongbishar bad ïa ki paidbah nongpeitkai lyngba ka jingtriem, ka jingstad bad ka riam ka beit jong ka bad katei ka samla ka la ïoh ruh ban rah ïa ka nam Miss Personality bad ka Miss Catwalk.
Ha ka First-Runner-up jong ka Miss Meghalaya 2023, la ïoh rah da ka samla Lasmiker Dkhar, katba ha ka Second Runner-up la ïoh rah da ka samla Sanijaijai Khyriem.
Ha ka liang ka Miss Teen Meghalaya 2023, ki la don 18 ngut ki nongïakhun ha kaba ka samla Angelina Jackson, kaba dang 18 snem ka rta ka la ïoh ïa ka nam lahduh kum ka Miss Teen Meghalaya 2023 ha ryngkat ka song pisa kaba T. 25,000.
Ka samla Angelina ka dei kaba dang pule ha St. Mary’s Higher Secondary School, Shillong.
Ka samla Angelina da ka jingbhabriew bad ka jingproh jabieng, ka la pynshohbiej ïa ki nongbishar bad ïa ki paidbah nongwan peitkai.
Ha ka First Runner-up jong ka Miss Teen Meghalaya 2023, ka samla Gracie Nandy ka la ïoh ïa katei ka nam, katba ha ka Second Runner-up pat la ïoh rah da ka samla Denice Kharkongor.
