Shillong, Nailur 11
U Myntri ka tnat pule puthi u Rakkam A Sangma u la ong ba kam dei satia kaba dei ban pynkylla rynsan saiñ hima ïa ka shlem ki jaka pule da kaba bynrap ba ka hukum jong ka Ïingbishar ruh ka shah ïa ki nonghikai ban rung sha ka saiñ hima, hynrei ym ban pynkylla ïa ki skul kum ki rynsan saiñ hima sima.
U Rakkam u la pynpaw ïa kane haba kdew ïa ka jingpynmih jingthoh u Director ka tnat School Education & Literacy, u Swapnil Tembe ha ka 8 tarik Nailur 2023, uba la pan jingshai na ka Principal jong ka Government Girls’ Higher Secondary School, Jowai halor ka jingpyntem ïa ka jingrwai ilekshon jong ka seng saiñ pyrthei ha ka sngi ba rakhe ïa ka sngi burom ki nonghikai ha skul.
U la ong ba ki khynnah ha ki jaka pule ba bun ki ju ïakmen haba tem ïa ki jingrwai ilekshon hynrei kam long satia kaba dei kum ka skul bad u don u pud ïa kiei-kiei.
“Mynta phi lah ban tem kawei ka jingrwai, lashai da kawei ka jingrwai jong kawei pat ka seng saiñ pyrthei bad la shisngi kumta ter ter bad lada ka long kumta kan don ka jingktah bad pynkylla kum ka rynsan saiñ hima,” u la ong.
Namarkata, dei ban kiar ïa kum kine kiba lah ban wanrah kynrum-kynram bad u la kyrpad ïa baroh kiba pynïaid skul ban nym pyndonkam ïa ki jingrwai jong ki seng saiñ pyrthei ha ki jaka pule.
U la ong ba ka tnat pule puthi kan pynmih ka jingbthah ïa baroh ki khlieh nongpynïaid jong ki jaka pule ban pyntikna ba kum kine kim dei shuh ban jia biang.
Une u Myntri u la bynrap ba ki don bun tylli kiwei pat ki jingtem bad jingrwai kiba biang ban shad ne lehkmen la ka dei ki jingrwai ieid ri bad kiwei kiwei da kaba kyrpad ïa ki khynnah pule ban nym pyndonkam ïa ki jingrwai jong ki seng saiñ hima ha ki jaka pule.
