Shillong, Nailur 12
Ka Khasi Students’ Union – Laban Circle (KSU-LC) ka la maham jur ïa ki paid bynriew Karbi bad ka Sorkar Assam ba kim dei ban kyntur pud sha Meghalaya, ha kajuh ka por kim dei satia ban pyndik ïa ki Khasi ba shong ba sah ha West Jaiñtia Hills District, lem kumta ka seng kan shim da ka sienjam ban khang khyrdep ïa ka Karbi House kaba don ha Laban.
“Ka seng ka kwah ban ai ka khubor kaba shai sha ki jaidbynriew Karbi bad kumjuh sha ka Karbi Anglong Autonomous Council (KAAC) bad ka Sorkar Assam ba kin sangeh noh shi syndon ïa ka jingleh donbor jong ki ïa ki paradoh parasnam kiba don ha khappud da kaba pyndik na ka por sha ka por – da ka jingkyntur pud sha ka Jylla Meghalaya, ka jingkhrong khajna beaiñ na ki kali mar rep jong ki nongshong shnong ka Jylla, ka jingbyrngem byrsit da ki seng lehnoh ki Karbi bad ka jingleh donbor ki bor pahara bad ki pulit Assam ïa ki paid Khasi,” la ong u General Secretary ka KSU-LC, samla Jason Laloo ha ka kyrwoh khubor.
Katkum ki jinglum khubor, ka seng ka la ong ba u Myntri Rangbah ka Jylla Assam, u Dr. Himanta Biswa Sarma (HBS) un sa wan hiar ha ka Sngi Balang (13 tarik u Nailur, 2023) sha Shillong ban plie ïa ka Karbi Hemtum House kaba don ha Laban bad ban buh ïa u mawnongrim jong ka ‘Hostel’ na bynta ki samla pule.
Ka seng kam shym la pynthut ïa ka jingtei jong ka Karbi House kaba don ha Laban, namar kam long ka jaidbynriew kaba bishni bad ban pyndik ïa ka jingdonkam jong kiwei pat ki jaidbynriew ’riewlum, u la ong.
“Ngi long ka jaidbynriew kaba tip briew tip Blei, hynrei ha kajuh ka por, ngim lah ban shu sngap jar lada ki paradoh parasnam jong ngi ki shah pyndik ha ki paid bynriew Karbi,” la ong ka kyrwoh na utei u samla nongïalam.
