Shillong, Nailur 12
U Myntri Rangbah, Conrad K Sangma u pynpaw ba ym pat da donkam ban wanrah da ka ‘resolution’ ha Ïingdorbar Thawaiñ pyrshah ïa ka jingthmu pyntreikam ïa ka Uniform Civil Code (UCC) ha kane ka Dorbar Synrai ka ban long mynta.
Haba kylli la ka Sorkar kan wanrah da ka ‘resolution’ ban pyrshah ïa ka UCC bad ïa ka Forest Conservation Amendment Act 2023, u la Conrad u la ong ba haduh mynta ym pat ïohi ïa ka Bill haba ïadei bad ka UCC bad ym pat lah ban ong ei ei bad yn pyrshah ïa kaei haba ym pat ïohi.
U la buh jingkylli pynban shu buh lada ka UCC ka ong ba yn shim jait noh na ka kynthei tharai ka Meghalaya kan pdiang.
Kumta u la ong ba kat bym pat ïohi ïa kaba thoh ha kata ka UCC, ym lah ban shu kren da kaba shu antad bad lada ong ban wanrah da ka ‘resolution’ kan dei halor kaei?
U la ong ba u la dep kren shai ba ka UCC ka dei kaei kaei kaba ym lah ban leh da ka suk kum ha India, hynrei ïa ka kaei yn pyrshah ne ban wanrah resolution pyrshah ïa ka UCC.
Haba kylli halor ka Forest Amendment Act 2023, u la ong ba kane ka aiñ ka kren shaphang ka jingbym donkam ban ïoh jingbit na ka tnat khlaw haba leh ïa ki projek.
Haba kylli halor ki projek kiba shah ban pyntrei khlem da shim jingbit lada ka jaka ka don hapoh 100 km na khappud jong ka ri, u Conrad u la ong ba kaei kaba ym donkam ban shim jingbit ka dei tang na ka tnat khlaw, hynrei donkam pat ban shim jingbit na kiwei pat kum na ka Jylla, District Council, Rangbah Shnong bad kiwei kiwei kiba dei ban ïoh jingbit.
U la ai nuksa kum ïa ka surok Shillong-Dawki kaba sahkut namar ym pat ïoh jingbit na ka tnat khlaw. Kumta kane ka aiñ ka ong bym donkam ban shim jingbit na ka tnat khlaw, hynrei kam mut pat ba ym donkam shim jingbit shuh kum na ka tnat shipai ha ki jaka ba shna surok kum ha thaiñ Umshyrpi.
Ka don ka jingsheptieng ba ka jingpynkylla ïa kane ka aiñ kan ktah bha ïa ki jaka ha ka Thaiñ Shatei Lam Mihngi khamtam ki jaka kiba don ha khappud bad kiwei ki ri namar ka ong ba kino kino ki projek kiba dei na ka bynta ka jingbha jong ka ri lah ban leh khlem da shim jingbit na ka tnat khlaw.
Haba kylli halor ka jingpynkylla ïa ka India sha ka Bharat, u Conrad u la ong um ïohi ban don kano-kano ka jingeh haba ïadei bad kane ka bynta namar naduh basdang kumba la kdew ha ka Riti Synshar ka ri, ka kyntien India, Bharat ka la don lypa.
U la ong ba wat ma u ruh haba u ai jingkren u ju pyndonkam lang ïa ka kyntien Bharat haba u ai jingkren, bad lada u kren da ka Hindi u pyndonkam ïa ka kyntien Bharat bad haba u kren da phareng u pyndonkam ïa ka kyntien India.
U la ong ruh ba um ïohi ba kan don kano-kano ka kynrum-kynram haba ïadei bad ka kyntien India ne Bharat namar ki dei kiba la don lypa hapoh ka Riti Synshar.
