Shillong, Nailur 13
Ki Myntri Rangbah ka Meghalaya bad Assam kin sa ïakynduh biang ha u Risaw ha shwa ban pynbeit ïa ka jingleit jngoh ïa ki jaka ha khappud hapdeng ka West Karbi Anglong district bad West Jaiñtia Hills district kiba don hapdeng ka jingïakynad. Kine ar ngut ki Myntri Rangbah ki la ïakynduh ruh ha Secretariat ha Shillong ha ka Sngi Balang na ka bynta ban wanrah ka jingshaniah markylliang bad ban pynneh ïa ka suk ka saiñ ha ki jaka khappud.
Kane ka jingïakynduh hapdeng u Myntri Rangbah ka Meghalaya, u Conrad K Sangma bad u Myntri Rangbah ka Assam, u Himanta Biswa Sarma ha Secretariat ka dei tang mar ïa wai ka jingïalang ba plie ïa ka Karbi Hamtun kaba don mar pyrshah bad ka skul Pine Mount.
Hadien ba la wai ka jingïalang plie ïa ka Karbi Hamtun, u Himanta u la wan beit-beit sha Secretariat na ka bynta ban ïakynduh ïa u Conrad K Sangma ha ka jingïadonlang u Symbud Myntri Rangbah u Bah Sniawbhalang Dhar uba dei ruh u Chairman ka Regional Committee na ka bynta ka West Jaiñtia Hills district bad u CEM ka Karbi Anglong Autonomous Council u Dr Tuliram Ronghang.
Hadien ba la dep ïakynduh, u Himanta bad u Conrad ki la kren sha ki lad pathai khubor bad ki la ïathuh ba ha kane ka jingïakynduh wat la kam dei kaba la pynbeit lypa, la ïoh ban ïakren haba ïadei bad ka mat pynbeit pud bad kumno ban pynneh ïa ka suk ka saiñ namar ba ki ar tylli ki Jylla ki trei shitom kumno ban pynbeit ïa u pud u sam hapdeng ki ar tylli ki Jylla.
U Himanta u la ong ba kane ka jingïakynduh ka long ban wanrah ïa ka jingshaniah hapdeng ki briew jong ki ar tylli ki Jylla. Nalor kane, u kyntu ruh ïa ki paidbah ha khappud ban pynneh ïa ka suk ka saiñ namar baroh ar tylli ki Sorkar Jylla ki trei bad shim ki lad ki lynti na ka bynta ka ban lah ban wanrah ïa ka jingpynbeit ïa u pud u sam.
Haba kylli lano ki ar ngut ki Myntri Rangbah kin leit jngoh ïa ki jaka ha khappud ka West Karbi Anglong bad West Jaiñtia Hills, u Himanta u la ong ba ha shwa ban leit sha kitei ki jaka, donkam ban ïakynduh biang, bad kane ka jingïakynduh ka lah ban long ha ka taïew banyngkong jong u Risaw lada lah kloi ban pynbeit, lane ha ka taïew ba-ar jong u Risaw.
U Himanta u la ong ba kam long kaba dei ban shu leit jngoh ïa ki jaka ha khappud lada kam don ka jingshaniah, namar lada mih ka kynrum-kynram hadien ba la dep leit jngoh, kan mih pynban ka jingkynnoh ïa ki nongïalam.
Kumta u la bynrap ba ha shwa ban leit jngoh ïa ki jaka ha khappud, donkam ban pynbeit bha, bad haba leit sha ki jaka khappud yn ïakynduh ruh ïa ki nongshong shnong jong kito ki jaka la ka dei na Karbi Anglong ne Jaiñtia Hills.
U Himanta u la pynkynmaw ba ha ka por ba leit jngoh ïa ka Langpih, ka don ka jingkmen hapdeng ki nongshong shnong bad u khmih lynti ba haba leit sha khappud ka West Karbi Anglong bad Jaiñtia Hills ruh kan don kajuh ka jingsngew jong ki briew kiba sah ha kito ki thaiñ, ym ban mih kano-kano ka jingbym shaniah.
Namar kata, u kyrmen ba lyngba ka jingdon ki nongïalam ha ki Regional Committee kiba la nang trei ïa ka kam bad kiba la leit jngoh ruh ïa ki jaka ha khappud, yn sa lah ban pynbeit ïa ki jingeh.
Haba kylli shaphang ki jaka kiba donkam ban pynphai biang na Assam sha Meghalaya kum na Block-I bad Block-II, u Myntri Rangbah ka Assam, u Himanta u la ong ba ïa kane ka jingkylli ym da dei eh ban kren namar ka dang don ka jingïakren bad ynda la dep ki jingïakynduh yn sa lah ban shim rai.
Na ka liang u Myntri Rangbah ka Meghalaya, u Conrad K Sangma u la ai khublei ïa u Himanta uba la pyllait por ban wan khnang sha Secretariat ban ïakynduh na ka bynta ban ïakren ïa kane ka mat haba ïadei bad ka jingpynbeit pud.
U la ong ba haba ïadei bad ka jingkylli ban pynphai biang ïa ki jaka na Assam sha Meghalaya, ka dei bynta jong ka jingïakren kaba la don bad kaba dang ïaid ka jingïakren pynbeit.
Kumta u khmih lynti ba lyngba ka jingïakren yn sa lah ban poi sha ka jingpynbeit ïa ki jingeh.
