Shillong, Nailur:
U Myntri Rangbah, Conrad K Sangma u la kren biang da kaba shai ba ka National Education Policy (NEP) ka dei ban ïaid beit shakhmat bad u la ong ba ka Sorkar Jylla ka kloi ban ïakren bad ki kolej kiba mad jingeh namar haba sdang ban pyntreikam ïa kano-kano ka mih beit ka jingeh.
Haba kylli kaei ka ban jia ïa ki samla pule namar ki shu kylla ‘langkñia ei namar ki don ki nonghikai ki bym pat kwah ban pyntreikam ïa ka NEP, u Conrad u la ong ba naduh basdang, u la ïoh ban ïakren bad ki nongpynïaid ki kolej bad kim pyrshah ïa ka NEP hynrei ki don kiba shu pynpaw jingeh namar yn donkam ban pynbiang ïa ki jingdonkam ha ki kolej nalor ka jingdonkam ban thung nonghikai shuh, bad ka por ban pule ha kolej ka dei noh 4 snem ym shuh tang 3 snem.
Kumta u la ong ba ka Sorkar Jylla ka kloi ban ïakren bad ki kolej kiba shem jingeh tangba kaba shai ka long ba ka NEP kan hap ïaid shakhmat.
Kum ban pynkynmaw, ki don katto-katne ki nonghikai kolej ki bym kwah ban pyntreikam ïa ka NEP, hynrei kiba bun ki kolej ki sngewdei ban pyntreikam noh namar ka dei ka jingmyntoi ïa ki samla pule.
