Shillong, Nailur 13
U President ka National People’s Party (NPP), Conrad K Sangma u la pdiang ïa u Bah HM Shangpliang, MLA barim ka Mawsynram konstitwensi sha ka seng NPP kaba long mynta ka sngi ka 13 tarik Nailur, 2023.
Ha kane ka sngi la ïadonlang ar ngut ki vice president, Bah Sniawbhalang Dhar bad Bah Prestone Tynsong kiba dei ruh ki Symbud Myntri Rangbah ka jylla, ki MLA, MDC bad u Dr. D.D Lapang.
Haba ai jingkren ha kane ka jingïalang, u Conrad u la pynpaw ba u Bah HM Shangpliang ha ka por ba u long kum u MLA u ju kren ha ïingdorbar ïa ka jingeh jong ki paidbah.
U la ong haba u wanrah ïa ka jingeh jong ki paidbah ha ïingdorbar u da pule bniah bad kane ka daw ba u sngewkmen haba u Bah HM Shangpliang u rung noh sha ka seng NPP.
Ha kajuh ka por u la bthah ïa u President ka NPP Meghalaya ban pynkhlaiñ noh ïa ki Unit, ki Block khnang ban pynkhlaiñ ïa ka seng NPP na bynta ka ilekshon ban sa wan namar ha kine ki hynriew bnai ba la kut ka ilekshon MLA ki la shong jahthait.
U Conrad u la ai khublei ïa u Bah Alvin Sawkmie uba la long rangbah ban pdiang ïa Bah HM Shangpliang ban pynkhlaiñ ïa ka seng NPP.
Katba u Bah HM Shangpliang, u la pynpaw ba u rung sha ka NPP ka long ban pynkhlaiñ ïa kane ka seng na ka bynta ban shakri kham bha ïa ki paidbah ka konstitwensi bad ïa ka jylla baroh kawei.
Katba u MDC ka Mawsynram konstitwensi ba dei ruh u President NPP Mawsynram Block u don jingkyrmen ba ka samla ba khatduh jong u Bah HM Shangpliang ka ban ïahap shyieng krung kan dei ha ka seng NPP.
Ïa kine ki kyntien u la pynpaw haba ai jingkren pdiang burom ïa u Bah HM Shangpliang ha ka jingïalang ka NPP ha Shillong ha ka jingïadonlang u Conrad K Sangma kum u President ka seng.
Kane ka jingpynpaw u Bah Alvin ka lah ban dei ba u Bah HM Shangpliang hadien ba u la jop ïa ka ilekshon MLA na ka seng Congress, hadien kata u la rung sha ka TMC, u la ïakhun ïa ka ilekshon MLA ba dang shu dep na seng BJP bad mynta u la rung sha ka NPP.
Namar kata, u Bah Alvin u don jingkyrmen ba ka jingïatreilang hapdeng kine ar ngut ki nongïalam kan pynkhlaiñ ïa ka NPP ha Mawsynram konstitwensi bad ka jylla baroh kawei.
