Shillong, Nailur 13
Ki nongshong shnong ka Lawkhla Mawlong kaba hap ha Mawphlang konstitwensi, East Khasi Hills District ki la ïoh ban pyllait im ïa kawei ka khynnah skul kaba shong klas-9 hadien ba ka la kum syntuid sha ka wah namar ka jingbym skhem ki mawkyndon kiba la shna ban jam sha shiliang ka wah. Kane ka la jia ha ka 12 tarik mynta u bnai ha ka por 9 baje mynstep.
Kane ka khynnah skul ka dei na ka shnong Laitdiker, hynrei namar ba ka jngai palat ban ïaid lyngba ka jingkieng; kumta ki nongrep bad ki khynnah skul haba ki leit sha Lawkhla Mawlong ki shu jam na kane ka wah kaba shu buh da ki mawkyndon.
Haba pynthikna ïa kane, la ïoh ban ïakren bad u Rangbah Shnong ka Lawkhla Mawlong, Bah Swotsharlin Marbaniang uba la ïathuh hadien ba kane ka khynnah ka la shah rong ha ka wah ka la sahkut ha uwei u maw bad ki briew kiba saitjaiñ ha kane ka wah ki la pyrta ban ïeng beit hajrong u maw khnang ban nym shah rong ha ka wah.
U la ïathuh biang ba dei ha kane ka por ki nongshong ka Lawkhla Mawlong ki la leit ban pyllait im ïa kane ka khynnah skul.
“Nga ai khublei ïa ki nongshong shnong kiba la ïarap lem ïa ka heprit kaba la lait im na kane ka jinghap na kane ka wah” u la ong.
“Kumta kum ka dorbar shnong ka kyrpad ïa u MLA bad kiwei de ki tnad lada ki don kano kano ka lad ban pynïoh noh jingkieng shatei sha shiliang kan nym jia shuh kaba sniew namar kane ka jaka ki don shibun ki jaka ban rep ban riang shatei sha shiliang namar kum ka shnong ngim kwah ba kaba sniew kan wan jia” u la ong biang.
Nalor kane, u la pynkynmaw ha ka por ba long MLA u Bah S.K Sun (bam kwai ha dwar u blei) u la kular ban pynïoh jingïarap ban shna jingkieng, hynrei namar u la khlad noh shiteng por kane ka jingthmu ka la sahkut noh. Kumta u la kyrpad ïa u MLA ba mynta ban ïarap lem.
U la ïathuh ba ha kine ki snem ki la don ki ’riew rangbah kiba hap ha kane ka wah, hynrei ki la sahkut ha shiteng ka wah namar ka jingdon ki maw.
