Shillong, Nailur 14
Ka Dorbar Shnong Mawlai Mawïongrim ha ka Sngi Palei ka 14 tarik Nailur, 2023 ka la leit ban ïakynduh ïa ka Deputy Commissioner (DC) ka East Khasi Hills District, ka Kong RM Kurbah ban dawa pynkhuid lane weng noh ïa u dewïong ba la ïoh kurup da ki pulit uba la buh harud ka surok jong katei ka shnong.
Haba kren sha ki lad pathai khubor hadien ka jingwan ïakynduh ïa ka DC, u Bah Sorbar L Nongpyuir, uba dei Rangbah Shnong jong ka Mawïongrim, u la ïathuh ba na ka liang ka DC ka la kular ban pynkhuid noh ïa utei u dewïong hapoh shitaïew da kaba sdang khot ‘tender’ noh.
U Bah Nongpyiur u la ïathuh ba ka la don mynta la 5-6 snem eiei ba ka Dorbar Shnong ka la ujor ïa katei ka jingpynhap ïa utei u dewïong hapoh Mawïongrim hynrei katei ka jingujor ka long lehnohei.
“Ngi ngeit skhem ba na ka liang jong ka Dorbar Shnong Mawïongrim hi ka ai por 15 sngi hynrei ngi ïohsngew mynta ba na ka liang jong ka DC, ka la ong ba hapoh shitaïew kin sa khot ‘tender’ na ka bynta jong u dewïong uba don hangthie hapoh Mawïongrim”, la ong u Bah Nongpyiur.
Nalor kata, u la ïathuh ba ka jingdon jong utei u dewïong ka ktah shibun ïa ka shnong ka thaw khamtam ïa ka tyllong umbam umdih, ka pynthor kba, ki pung dohkha bad kiwei kiwei.
“Na ka por sha ka por, na ka liang jong ka Dorbar Shnong, ngi khlem shong kli-kti hynrei ngi la ïakhih ïaksaid katba lah hi na ka bynta ban weng namar ka la ktah palat ïa ki nongshong shnong kiba pyndonkam ïa umbam umdih hynrei na ka liang jong ka sorkar ka khlem shim khia”, la ong u Bah Nongpyiur.
Namar kata, na ka liang ka Dorbar Shnong kan ai por 15 sngi ïa ka sorkar ba kan pynkhuid noh ïa utei u dewïong. Lada ym lah ban pyndep ha ki 15 sngi ban pynkhuid ïa u dewïong, ka Dorbar Shnong kan sa shim da kiwei pat ki rai.
Shuh shuh na ka liang Dorbar Shnong ka la ïathuh ba kaba pynlyngngoh ka long ruh ba u dewïong shipor u jah bad shipor pat u dap biang bad ka shnong ruh kam don jingtip halor kane namar ba ka dei ka kam mynmiet mynïong.
“Na ka por sha ka por ki theh, u dewïong u jah bad u wan hi, u leit kumno bad u wan kumno ruh ngim tip hynrei da u mon ban dap u dap hi bad da u mon ban jah u jah hi… ka dei ka kam kaba shiteng miet shiteng synñia bad ka shnong ruh kam tip”, la ki nongïalam shnong.
